La Universidá d'Uviéu abrió esti martes la primer edición de la Escuela de Branu de Criptografía Avanzada en Ciberseguridad, un programa entamáu al pie de la Universidá de Llión que cunta con una trentena de participantes. Mientres cuatro xornaes, la Facultá de Comerciu, Turismu y Ciencies Sociales Xovellanos, en Llaboral Ciudá de la Cultura (Xixón), acueye un programa académicu combináu con conferencies d'espertos y práctiques.

“Esperamos qu'esta Escuela de Branu dexe siguir avanzando nel desenvolvimientu de ferramientes eficientes para encetar problemes de gran dimensión en tiempu real, amás d'amontar la collaboración ente equipos d'investigación de les universidaes d'Uviéu y Llión, favoreciendo asina'l caltenimientu de la nuesa universidá na vanguardia de la investigación”, apostó Pedro Alonso, catedráticu en Matemática Aplicada y vicerrector de Polítiques de Profesoráu y Ordenación Académica de la Universidá d'Uviéu, que codirige el programa al pie de Miguel Carriegos, responsable del proyectu Técniques básiques en ciberseguridad: evaluación y certificación automática y perspectiva post-cuántica (TBCQ) de la Universidá de Llión, l'Institutu Nacional de Ciberseguridad (INCIBE) y l'Universidá de Washington.

La Escuela de Branu ufierta a los y les inscrites una redolada altamente especializada nel qu'aprender ya intercambiar esperiencies con un grupu de profesionales ya investigadores de primer nivel, provenientes de distintes universidaes, institutos d'estudios y empreses. Participen tanto estudiantes con conocencies en Matemátiques ya Informática como técnicos y profesionales del sector de la ciberseguridad.

El programa ufierta xuna introducción a la criptografía y a la codificación dende la perspectiva del mundu de la ciberseguridad, faciendo fincapié nos nuevos retos y oportunidaes que brinda la computación cuántica. La criptografía ye la práctica de desenvolver y utilizar algoritmos codificados pa protexer y despintar la información tresmitida y que solo pueda ser lleida por aquellos con permisu o capacidá pa descifrala. Pela so parte, la computación cuántica constitúi un nuevu paradigma al dexar que el ordenadores cuánticos realicen cálculos de manera exponencialmente más rápida que los clásicos, xuna batalla que yá llibren les grandes compañíes tecnolóxiques pa diseñar l'ordenador del futuru.

Al pie de la formación académica, tán previstes trés conferencies que van complementar la programación d'esta Escuela de Branu. Dos d'elles son impartíes por Ismael Faru, espertu en computación cuántica ya intelixencia artificial de la multinacional tecnolóxica IBM. Él foi l'encargáu d'ufiertar la charra inaugural y va ufiertar la de clausura, colos títulos Redolaes y modelos de programación cuántica y Relación ente la computación cuántica actual y l'Intelixencia Artificial. Amás, el coronel José Ignacio Castro, analista del Institutu Español d'Estudios Estratéxicos, va falar sobro Estudios estratéxicos: La segunda revolución na mecánica cuántica y la so aplicación a les tecnoloxíes de la defensa.

La Cátedra de Ciberseguridad de la Universidá d'Uviéu y el proyectu Técniques básiques en ciberseguridad: evaluación y certificación automática y perspectiva post-cuántica (TBCQ), acomuñáu a la Universidá de Llión, son los responsables de la puesta en marcha d'esta Escuela de Branu, que cunta con financiamientu de los fondos europeos NextGenerationEU, al traviés del Institutu Nacional de Ciberseguridad (INCIBE).