El trabayu d'actualización cartográfica de Natura 2000, una rede ecolóxica europea d'árees de caltenimientu de la biodiversidá, consiste en ‘escaniar’ a bien altu resolvimientu les 24.298 árees qu'integren la Rede, que la so estensión supera los 735.000 kilómetros cuadraos | L'Axencia Europea de Medioambiente axudica'l contratu, que s'enmarca nel proyectu Copernicus, a un consorciu del que formen parte tamién grupu francés CLS y l'empresa belga Evenflow | El Serviciu de Vixilancia Terrestre de Copernicus (Copernicus Land Monitoring System) va cuntar en cuatro años con una completa y actualizada información sobro l'estáu de los hábitats de la rede por aciu l'analís de datos d'imaxes satelitales y de bien altu resolvimientu | Esta información va dexar analizar la evolución de toles árees protexíes y, arriendes d'ello, tomar les decisiones más convenientes n'orde al oxetivu fundacional de Rede Natura 2000, que ye la protección y caltenimientu de la biodiversidá y los hábitats clave frente a les amenaces del cambéu climáticu y l'actividá humana
L'Axencia Europea de Medioambiente (EEA), al traviés del Serviciu de Vixilancia Terrestre de Copernicus (CLMS, poles sos sigles n'inglés), axudicó a un consorciu internacional lideráu pola empresa tecnolóxica de Grupu Tecopy, COTESA, y l'Universidá d'Uviéu, el contratu d'árees protexíes (EU-Protected Areas) para actualización cartográfica de la Rede Natura 2000, el más estensu espaciu natural protexíu del mundu. L'oxetivu d'esti contratu ye conocer l'estáu actual del suelo —cobertoria y usu— de toles árees protexíes de la Rede, que s'alcen a 24.298, que la so estensión supera los 735.000 kilómetros cuadraos.
Ye la primer vegada que la EEA axudica la coordinación d'un contratu d'estes característiques a un consorciu internacional lideráu por entidaes españoles, que la so propuesta ufierta les ventayes de la collaboración ente una empresa tecnolóxica y l'universidá. Amás de COTESA y l'Universidá d'Uviéu, el proyectu cunta cola participación del grupu francés CLS (sociu principal) y l'empresa belga Evenflow.
Ye tamién la primer vegada que se plantega l'actualización de la información cartográfica de tola superficie de Rede Natura, una y bones el proyectu anterior (N2K) solamente algamó 4.790 espacios protexíos, la quinta parte de los esistentes. Esti oxetivu podrá algamar gracies a xuna de les innovaciones más destacaes del proyectu, que ye la incorporación que ye la incorporación de la intelixencia artificial (IA) y del procesu cartográficu semiautomático, arriquecíu de la mesma con información homoxénea y calidable de datu in situ de cada área biogeográfica.
D'esta manera, nel plazu de casi cuatro años, el Serviciu de Vixilancia Terrestre de Copernicus de la EEA va cuntar con una completa y actualizada información sobro l'estáu de los hábitats de la Rede por aciu l'analís de series temporales datos d'imaxes satelitales (Sentinel 1 y 2) dende 2017, sometíes estes postreres a procesos de IA y super-resolution, según otres imaxes de bien altu resolvimientu (VHR) procedentes de distintes misiones satelitales pa los años 2021 y 2024. Esta información va dexar analizar la evolución de toles árees protexíes y, arriendes d'ello, tomar les decisiones más convenientes n'orde al oxetivu fundacional de Rede Natura 2000, que ye la protección y caltenimientu de la biodiversidá.
Sía que non, anque'l nuevu planteamientu supon un cambéu de métodu, el serviciu va caltener la so denominación anterior (N2K) pa referise al productu actual, calteniendo'l so legáu y familiaridá, magar l'oxetivu ye xenerar una nueva metodoloxía que dexe consolidar un modelu estable nel futuru. Con esti propósitu, el consorciu decidió incorporar adicionalmente al so plan de trabayu la realización d'una serie de proyectos piloto que van consistir na identificación de tolos tipos de hábitats de Rede Natura en distintes rexones europees. Unu d'ellos desenvolveráse na rexón cantábrica del norte d'España. La realización d'estos pilotos va contribuyir a desenvolver un modelu de metodoloxía futura que dea respuesta a los requerimientos de la Directiva Hábitats (Directiva 92/43/CEE del Conseyu, de 21 de mayu de 1992, relativa al caltenimientu de los hábitats naturales y de la fauna y flora monteses) y otres polítiques ambientales na Unión Europea.
Borja Jiménez Alfaro y Jose Manuel Álvarez-Martínez, investigadores de la Universidá d'Uviéu, destaquen que la cartografía de vexetación y cambeos nel paisaxe ye esencial pa la Rede Natura 2000, yá que apurre xuna ferramienta fundamental pal caltenimientu y xestión sostenible de los espacios naturales, la biodiversidá y los servicios ecosistémicos clave qu'esta nos apurre. “El proyectu va suponer una meyora importante sobro otros productos similar y anterior, pos sobro la base cartográfica d'ocupación y cambeos, el productu final va apurrir información sobro el patrones de biodiversidá esistentes na Rede Natura 2000 a escala europea, sentando les bases, xuntu colos proyectos piloto, d'un plan de siguimientu de los tipos de hábitats y especies d'interés nel futuru”, comenten dambos investigadores.
Pela so parte, Aurelio García Rochera, director de la área d'Analís Geoespacial y Observación de la Tierra (Ageo) de Cotesa, aseguró que se trata de “un proyectu de base estratéxica pa la nuesa compañía”, que “va marcar una directriz bien importante n'otros servicios y productos del Serviciu de Vixilancia Terrestre de Copernicus no que queda del 2024 y 2025, como son Corine Land Cover, Riparian zones y Coastal zones”. García Rochera considera que la clave de qu'esti productu vaiga convertise nuna referencia pal futuru, inaugurando xuna nueva etapa, “ye pola metodoloxía basada n'intelixencia artificial y un gran porcentaxe d'automatismos, frente a los tradicionales métodos cartográficos totalmente manuales que se realizaben enantes pa executar estos servicios”.
