El proyectu NEXPECH2 pretende responder a dellos desafíos: prevenir l'escosamientu de los recursos naturales, satisfaer la demanda creciente d'enerxía y amenorgar de manera efectiva les emisiones de gases d'efectu invernaderu | L'oxetivu final ye producir hidróxenu verde nun prototipu a escala de llaboratoriu por aciu el desenvolvimientu d'un innovador sistema fotoelectroquímico para maximizar la captación de lluz solar y la conversión solar eficiente a elementu químicu | La nueva tecnoloxía va contribuyir al desenvolvimientu d'una economía verde y sostenible por aciu la creación de nuevos empleos necesarios para la producción de les nueves soluciones y l'operación y caltenimientu de futures instalaciones | El profesores del Departamentu de Física de la universidá asturiana Víctor Manuel García Suárez y Roberto Luis Iglesias Pastrana participen nesta iniciativa europea al pie de investigadores franceses y noruegos
Llograr hidróxenu verde (H2) a partir d'agua por aciu un procesu electroquímicu xeneráu con lluz solar. Este ye l'oxetivu del proyectu européu NEXPECH2 nel que participa la Universidá d'Uviéu. La tecnoloxía desenvuelta por esti proyectu pretende responder a dellos desafíos: prevenir l'escosamientu de los recursos naturales, satisfaer la demanda creciente d'enerxía y, coles mesmes, amenorgar de manera efectiva les emisiones de gases d'efectu invernaderu.
El proyectu NEXPECH2 (Next generation photoelectrochemical cell for hydrogen generation) cuenta cola participación d'investigadores franceses, españoles y noruegos. Ta coordináu pol investigador Mohamed Nawfal Ghazzal, del Institut de Chimie Physique de París (Centre National de la Recherche Scientifique - CNRS). N'España, formen parte d'esta iniciativa europea'l catedráticu Víctor Manuel García Suárez y el profesor Roberto Luis Iglesias Pastrana, del Departamentu de Física de la Universidá d'Uviéu, y Jordi Albiol y Alba Garzón Manjón, del Institutu Catalán de Nanociencia y Nanotecnología (ICN2).
El profesores García Suárez ya Iglesias Pastrana recuerden que l'hidróxenu verde ye un combustible químicu llimpiu y sostenible que puede almacenase a gran escala mientres enforma tiempu y utilizase pa reemplazar los combustibles fósiles como mediu de provisión d'enerxía, combustible pal tresporte y materia primo. L'oxetivu final de NEXPECH2 ye producir hidróxenu verde nun prototipu a escala de llaboratoriu por aciu el desenvolvimientu d'un innovador sistema fotoelectroquímico (PEC) pa maximizar la captación de lluz solar y la conversión solar eficiente a elementu químicu. El proyectu va desenvolver un dispositivu compactu de baxu costo coles mires d'algamar la mayor eficiencia posible.
Dambos investigadores sostienen que'l proyectu tien importante efectos científicos, económicos y sociales y ambientales.
Impactos científicos
El propósitu d'esti proyectu ye apurrir hidróxenu verde a un nivel tecnolóxicu avanzáu en términos d'eficiencia, estabilidá, costo de producción y ampliación de dispositivos de conversión d'hidróxenu d'enerxía solar a combustible. Los impactos científicos esperaos son dos. Primero, l'intercambiu de conocencies al traviés d'actividaes d'investigación específiques con socios de la Unión Europea, lo que va dexar avanzar na comprensión científica y la tecnoloxía más puntura y, amás, va fortalecer la base tecnolóxica de los socios europeos ya internacionales. “Los socios van desenvolver, siquier, dos tecnoloxíes innovadores, esto ye, fotoelectrodos basaos en grafdiino 2D y nanoestructuras fotónicas pa una recueya óptima de lluz y xeneración d'hidróxenu, lo que-yos dexará cerrar la fienda y convertise n'unu de los principales grupos d'investigación en fotosíntesis artificial y dispositivos fotoelectrocatalíticos”, afirma García Suárez. Y, segundu, esta iniciativa colaborativa va acelerar el desenvolvimientu de combustibles anovables y sostenibles que compitan coles alternatives a los combustibles fósiles. “La tecnoloxía propuesta de NEXPECH2 va tener el potencial de convertise nel combustible químicu alternativu llimpiu, seguro y sostenible más prometedor a escala de prototipu por aciu la conversión de la enerxía solar n'hidróxenu como combustible químicu llimpiu y sostenible que puede almacenase a gran escala mientres enforma tiempu”, añede Ilesies Pastrana.
Impactos económicos
El proyectu NEXPECH2 va sirvir como base p'averar la tecnoloxía pa la producción d'hidróxenu por aciu la división fotoelectroquímica de l'agua a los productos comerciales. NEXPECH2 --incluyíes les sos posibles patentes-- va llevar la tecnoloxía del TRL (Technology Readyness Level, Nivel de Maduror Tecnolóxicu, de 1 a 4. El TRL ye una clasificación que s'utiliza pa determinar cómo de madura ta una tecnoloxía, esto ye, cómo de cercana ta a la so comercialización. “Esperamos que, al rematar NEXPECH2, créese la necesidá, al traviés de futuros proyectos europeos qu'arreyen a la industria, de validar la tecnoloxía y desenvolver prototipos industriales (TRL 6). Amás, el proyectu va dexar que la collaboración yá establecida ente tolos socios de NEXPECH2 siga mientres muncho tiempu”, comenten dambos investigadores.
Impactos sociales y ambientales
L'Alcuerdu de París alcanzáu na COP21 establez oxetivos legalmente venceyantes por que los países amenorguen les sos emisiones de gases d'efectu, lo que va contribuyir a acelerar la transición escontra una economía baxa en carbonu. “La conversión d'enerxía solar en combustible d'hidróxenu ye xuna tecnoloxía prometedora col potencial d'apurrir enerxía sostenible, llimpia y almacenable pa una variedá d'aplicaciones”, sorraya'l profesor García Suárez. El proyectu va dexar a les sociedaes amenorgar la dependencia de los combustibles fósiles importaos, lo que va conducir a una mayor independencia enerxética y coles mesmes va ameyorar l'accesu a la enerxía anovable pa les comunidaes desoyíes. “Esta nueva tecnoloxía va contribuyir al desenvolvimientu d'una economía verde y sostenible por aciu la creación de nuevos empleos necesarios pa la producción de les nueves soluciones y l'operación y caltenimientu de futures instalaciones”, conclúi Ilesies Pastrana.
https://www.aei.gob.es/sites/default/files/convocatory_info/file/2024-02/PCI2024_1_fda.pdf
