El Grupu 9 d'Universidaes (G-9) va desenvolver estratexes comunes para faer frente a los desafíos que supon l'empléu de la intelixencia artificial nes instituciones públiques d'educación cimera. Este foi unu de los alcuerdos alcanzaos güei na xunta de trabayu de la Comisión Sectorial de Tresformamientu Dixital del G-9, que s'axuntó mientres dos díes n'Uviéu y na qu'actuó como anfitrión Secundino González, delegáu del Rector para'l Tresformamientu Dixital na universidá asturiana.

La comisión, presidida por Ramón Gonzalo, rector de la Universidá Pública de Navarra, encetó cuestiones de plena actualidá como l'usu de la intelixencia artificial xenerativa n'educación cimera, la seguridá avanzada en redolaes educatives o la esplotación predictiva de datos, sofitada tamién n'intelixencia artificial para prevenir, por casu, l'abandonu universitariu.

Los miembros del G-9 punxeron como exemplu la ferramienta Copilot, qu'incorpora Microsoft para Oficce 365, que tien múltiples potencialidaes para facilitar el trabayu del personal docente ya investigador. Les instituciones integrantes del Grupu 9 amosaron la so esmolición pol altu preciu d'esta ferramienta qu'enzanca la so incorporación n'universidaes públiques con recursos llindaos.

La comisión sectorial plantegó tamién la necesidá de dar nuevos pasos nuna tema tan esmolecedora como la seguridá informática, especialmente comprometida pol empléu de distintos dispositivos informáticos que nos dexen conectanos non solo internamente sinón tamién externamente. Los miembros del G-9 estudien la posibilidá d'incorporar nueves ferramientes para la xestión de sistemes integraos nes sos universidaes col fin de protexer al máximu la seguridá.

Una tema especialmente interesante que trató la comisión ye l'usu de la intelixencia artificial na esplotación predictiva de datos y, más en concretu, na prevención del abandonu universitariu. El modelu piloto, que foi enllantáu pola Universidá d'Uviéu, emplégase tamién agora, con meyores, na Universidá de Castiella-La Mancha. Esti sistema intelixente toma datos del campus virtual para estudiar, por casu, la evolución nel rendimientu del alumnáu y prevenir asina posibles abandonos. El modelu, que se sofita en ferramientes de machine learning, puede emplegase non solo para esta cuestión concreta, sinón para munches otres. Secundino González esplicó que les universidaes disponemos de muncha información de datos y con estos sistemes buscamos agora cómo esplotar esa información de cara a facilitar tomar de decisiones”.

Mientres la xunta de la Comisión Sectorial de Tresformamientu Dixital, presentóse tamién la integración de los sistemes internos de la Universidá d'Uviéu, que tien por oxetu centralizar la información por que los usuarios –estudiantáu, personal docente ya investigador y personal técnico y d'alministración y servicios-- puedan aportar dende un únicu puntu a toles xestiones que rican. El sistema, que yá foi empecipiáu, ta pindiu de futuros desenvolvimientos. 

A lo último, la comisión, a la que dio la bienvenida Ignacio Villaverde, rector de la Universidá d'Uviéu, amosó amás la so esmolición poles dificultaes que trai la xustificación de los proyectos UNIDIGITAL, un plan impulsáu pol Ministeriu d'Universidaes para llograr la digitalización del sistema universitariu.