El Grupu de Conductes Adictives de la Universidá d'Uviéu va poner en marcha un proyectu d'investigación que va combinar la terapia psicolóxica col usu de pulseres d'actividá para dexar el tabacu. Los especialistes d'esti grupu tán agora na fase de reclutamiento de los voluntarios que quieran participar nel estudiu. Los únicos requisitos que tienen de cumplir son ser mayores de 18 años, fumar, siquier, 10 pitos al día y comprometese a siguir un tratamientu mientres un periodu de seis selmanes na clínica qu'esti grupu d'investigación tien allugada na Facultá de Psicoloxía de la universidá asturiana.

Alba González Roz ya Ignacio Cuesta, investigadores de Grupu de Conductes Adictives, recuerden que'l tabaquismu ye la principal causa de muerte prevenible nel mundu y provoca, aprosimao, cinco millones de muertes cada añu. Amás, el consumu de tabacu ta frecuentemente acomuñáu a otru importante problema de salú pública nel nuesu país: el sedentarismu. El investigadores espliquen que el fumadores suelen presentar niveles más altos de sedentarismu que la población non fumadora, lo qu'implica un riesgu entá mayor para'l so salú. “L'exerciciu físicu ye una de les estratexes más eficaces para llograr l'abandonu del tabacu. La práctica d'actividá amenorga les ganes de fumar, el síndrome d'astinencia o los estaos d'ánimu negativos. Tamién resulta clave para amenorgar la ganancia de pesu, que ye habitual cuando se dexa de fumar”, sorraya González Roz. 

Dende va dellos años, el mercáu ufierta a disposición de los usuarios les llamaes pulseres d'actividá, dispositivos que dexen monitorizar diversos aspeutos relativos a la salú de les persones como l'actividá física, el suañu o'l nivel de estrés nel so día a día. “Estos dispositivos demostraron ser eficaces para aumentar l'actividá física en diversos estudios”, añede Ignacio Cuesta.

El Grupu de Conductes Adictives cuenta con una amplia esperiencia na investigación y práctica clínica n'adicciones. Nos postreros 10 años, más de 500 persones recibieron tratamientu para dexar de fumar y les tases d'ésitu superaron el 90% al rematar la intervención. El programa qu'agora se presenta ye un tratamientu psicolóxicu con una duración de 6 selmanes consecutives, con una sesión selmanal y ye totalmente gratuitu. El tratamientu que s'ufierta foi financiáu pola Fundación para'l Fomentu n'Asturies de la Investigación Científica Aplicada y la Tecnoloxía (AYUD/2021/50884).

Información para participar nel estudiu:
Unidá Clínica de Conductes Adictives
grupoca@uniovi.es
Telf: 985104189

Facultá de Psicoloxía, Departamentu de Psicoloxía, Universidá d'Uviéu