La Universidá d'Uviéu recupera l'espíritu col que nació la Estensión Universitaria con una programación que va llevar el meyor cine, teatru, esposiciones, música y cursos por toa Asturies. El vicerrector d'Estensión Universitaria, Cultura y Deportes, Vicente Domínguez, presentó esta mañana dalgunes de les actividaes que va desenvolver la Universidá d'Uviéu y que tienen como misión ufiertar "alta cultura" pa tolos públicos.

Una de les grandes novedaes nesta nueva etapa ye la proyección d'un ciclu de cine llatinoamericanu, desconocíu pol gran públicu pero multipremíau nos principales festivales internacionales, como Cannes, Berlín o Sundance.

'Latin Fever. Collecha del nuevu cine llatinoamericanu' va ufiertar una oportunidá única n'España p'averase a una producción cinematográfica "que sería un luxu pa Barcelona o Madrid", con una selección de películes calidable oldeada, proxectaes en formatu fílmico de 35 mm, y que les sos copies fueron apurríes tantu polos productores como por delles de les distribuidores internacionales más importantes del mundu, nun gran esfuerzu loxísticu. Na programación d'esti ciclu, la institución académica cuenta cola collaboración de Cajastur, el Conceyu d'Avilés, y el Festival Internacional de Cine de Xixón

D'esta miente, la Universidá d'Uviéu recupera la tradición de los años 60 y 70 nos que la Estensión Universitaria programaba ciclos de cine bien potentes, en palabres del vicerrector. ‘Latin Fever' va celebrar n'Uviéu (Centru Cultural Cajastur) y n'Avilés (Casa de Cultura) a partir del 11 d'abril y hasta el 7 de xunu. Los siete títulos que formen el ciclu percuerren bona parte de la xeografía llatinoamericana (Colombia, Chile, Arxentina, México, Uruguai, Costa Rica…).

• Zona Sur, de Juan Carlos Valdivia. Llunes 11 de abril – Uviéu / Martes 12 de abril – Avilés
• Ilusiones Óptiques, de Cristián Jimenez. Llunes 18 de abril – Uviéu / Martes 19 de abril – Avilés
• Lake Tahoe, de Fernando Eimboke. Llunes 9 de mayo – Uviéu / Martes 10 de mayo - Avilés
• Añu Bisiestu, de Michael Rowe. Llunes 16 de mayo – Uviéu / Martes 17 de mayo - Avilés
• El sangre brota, de Pablo Fendrick. Llunes 23 de mayo – Uviéu / Miércoles 25 de mayo - Avilés
• La vida útil, de Federico Veiroj. Llunes 30 de mayo – Uviéu / Martes 31 de mayo - Avilés
• Agua fría de mar, de Paz Fábrega. Llunes 6 de junio – Uviéu / Martes 7 de junio - Avilés

Esti ciclu de cine ye namás una pieza na nueva programación d'Estensión Universitaria que yá empezó a dar los primeros pasos, cola xira que, sol títulu ‘Más allá de la Y', lleva al Coru Universitariu mientres los meses de marzu y abril per Cangues d'Onís, Ribesella, Castropol y Salas; con una nueva ufierta de cursos de branu; y con nueves esposiciones que se van dir presentando a lo llargo del añu.

Ente los proyectos, el vicerrector anunció tamién la recuperación del grupu de teatru con una xira con compañíes profesionales asturianes que va recalar n'ocho localidaes. El so títulu yá lu diz tou: La escena ambulante, porque –en palabres de Vicente Domínguez—"la Estensión universitaria tien que ser ambulante; si nun ye ambulante, nun ye Estensión".