Un equipu d'investigación lideráu pola Universidá d'Uviéu afayó un nuevu mecanismu que regula la producción d'antibióticos en Streptomyces por aciu la modulación del equilibriu de los niveles intracelulares de fósforu. El investigadores de la institución académica asturiana identificaron un xen que la so mutación dexa controlar estos niveles intracelulares, que resulten claves para l'activación o la inhibición de la producción de compuestos bioactivos en Streptomyces. Esti afayu abre, según esti equipu científicu, una vía prometedora que podría llevar, n'última instancia, al descubrimientu de nuevos antibióticos y otros compuestos bioactivos.

El trabayu foi lideráu pola Dra. Gemma Fernández, del equipu d'investigación del Dr. Ángel Manteca, dambos integrantes del grupu d'investigación Biotecnoloxía de Nutracéuticos y Compuestos Bioactivos (BIONUC), de la Universidá d'Uviéu. L'estudiu acaba de ser publicáu na revista Communications Biology, de la editorial Springer Nature, de máximu impactu na so área de la conocencia.

La Dra. Gemma Fernández, investigadora del Departamentu de Bioloxía Funcional de la Universidá d'Uviéu, recuerda que Streptomyces ye una bacteria non patóxena del suelu, conocida como la bacteria de los antibióticos, una y bones “la mayoría de los antibióticos usaos en clínica, amás de munchos antitumorales, inmunosupresores y otros compuestos bioactivos fueron afayaos a partir de cepes d'esta bacteria”. “Combatir la resistencia a antimicrobianos, la llamada pandemia silenciosa, ye unu de los retos más urxentes en biomedicina. Enfrentala rique tantu optimizar l'usu d'antibióticos como afayar nuevos compuestos y Streptomyces sigue siendo nuesa principal fonte para atopar nuevos antibióticos”, sorraya. 

El autores del trabayu espliquen que, gracies a la secuenciación del ADN de cepes de Streptomyces, afayóse que la inmensa mayoría de les rutes biosintéticas de compuestos bioactivos d'esta bacteria nun s'activen nel llaboratoriu. Estes rutes, denominaes rutes silencioses, podríen allugar antibióticos y otros compuestos bioactivos qu'esperen ser descubiertos. 

L'activación de les rutes silencioses’

“L'activación d'estes rutes silencioses ye unu de los retos más importantes de la biotecnoloxía microbiana, y equí ye onde s'enmarca'l nuesu descubrimientu”, comenta'l Dr. Manteca, profesor del Departamentu de Bioloxía Funcional de la Universidá d'Uviéu. “Si la modulación de l'activación de les rutes biosintéticas en base a la regulación de los niveles de fósforu intracelular pudiera aplicase a cualquier cepa de Streptomyces, podríamos dar un pasu de xigante  a la d'aportar a les rutes silencioses de compuestos bioactivos que permanecieron invisibles para la ciencia”, añede esti investigador.

El autores del trabayu resalten que, anque entá se precisa esperimentación aplicada para implementar el mecanismu d'activación de la producción d'antibióticos descubiertu pol equipu de la Universidá d'Uviéu a los procesos de busca de nuevos fármacos a partir de colecciones de cepes de Streptomyces, la meyora consiguida abre una vía prometedora que podría llevar, n'última instancia, al descubrimientu de nuevos antibióticos y otros compuestos bioactivos.
 

Referencia

Fernández-García, G., García-Cancela, P., Corte-Rodríguez, M. et al. The DeoR-like pleiotropic regulator SCO1897 controls specialised metabolism, sporulation, spore germination, and phosphorus accumulation in Streptomyces coelicolor. Commun Biol 7, 1457 (2024). https://doi.org/10.1038/s42003-024-07164-8

Pie de semeya: De derecha a izquierda, Patricia Magadán, Paula Valdés, Ángel Manteca, Sergio Alonso, Claudio Villar, Patrick McAlpine, Luis Fernández, Juan Serna, Gemma Fernández, Javier Fernández, Ignacio Gutiérrez y Felipe Lombó.