La Universidá d'Uviéu y l'empresa Elinsa roblaron güei un alcuerdu de collaboración para la constitución de la Cátedra Grupu Amper, que naz  coles mires d'impulsar la formación, la investigación y la divulgación de soluciones de control y d'electrónica de potencia n'aplicaciones industriales, navales y de defensa. La cátedra, amás, va promover la collaboración ente la empresa y l'institución académica nel diseñu y aplicación d'iniciatives d'interés mutuu y de relevancia pa la sociedá asturiana y va poner en marcha programes de práctica d'empresa. 

La cátedra va realizar diverses acciones empuestes a potenciar la conocencia de les soluciones de control y electrónica de potencia tanto escontra l'estudiantáu de la Universidá d'Uviéu como a la sociedá nel so conxuntu. En concretu, nel marcu de la cátedra, van realizase acciones d'investigación, como'l desenvolvimientu conxuntu de llínees d'I+D+i, la propuesta de proyectos d'investigación nacionales ya internacionales, o l'alquisición d'equipamientu específicu pal desenvolvimientu de les sos llínees de trabayu. 

Amás, tocantes a divulgación y tresferencia, la nueva cátedra Grupu Amper va realizar xornaes y va editar publicaciones sobro les temes del so ámbitu de competencies. En formación y docencia, va collaborar nel diseñu y impartición de los programes académicos, va poner en marcha ayudes y premios a trabayos de fin de grau o máster y tesis doctorales, va financiar práctiques esternes extracurriculares y va entamar conferencies, seminarios, talleres, etc. 

Pa tollo, la empresa Elinsa y l'Universidá d'Uviéu roblaron un conveniu que va tar vixente hasta l'exerciciu 2025. El financiamientu apurríu pola empresa ye de 30.000 euros (7.500 euros pal exerciciu 2023, 15.000 pa 2024 y 7.500 pa 2025).  

Carlos Rivas, director d'I+D+i de Elinsa-Grupu Amper, sorrayó que la nueva Cátedra Grupu Amper “da un pasu más na yá llarga trayectoria de collaboración qu'empecipiamos cola universidá fai unos diez años”. Esti nuevu finxu consolida nuesa la collaboración, la investigación y la tresferencia de conocencia ente dambes entidaes. Tou ello, enmarcáu n'una de les tecnoloxíes clave de la próxima transición enerxética y de la so evolución en diversos campos como son el tresporte y l'industria”. “Esta cátedra quier ser un catalizador d'oportunidaes pa tolos grupos d'interés na tresferencia de conocencia nel procesu de desenvolvimientu d'estes tecnoloxíes”.
 
Pela so parte, Ignacio Villaverde, rector de la Universidá d'Uviéu, qu'allegó a la firma acompañáu de Begoña Cueto, vicerrectora de Tresferencia y Relaciones cola Empresa, esplicó “esti conveniu ye una reblagada adelantre, yá que, pa mirar al futuru, universidá y empresa tienen de dir de la mano”. “Tamos bien estimaos a Elinsa, porque entendemos que la firma d'esti conveniu reafita la clara apuesta que les empreses faen por potenciar les capacidaes de quien van ser los inxenieros de la mañana”, dixo, y añedió que “la universidá tien la conocencia que'l texíu empresarial precisa pa encarar los nuevos retos que se dan nestos tiempos de cambeos vertixinosos, somos capaces de pensar el futuru y d'esperimentalo”. 

Nel actu de firma del conveniu, tamién tuvieron presente Marcelino Pernas Barcia, responsable de Desenvolvimientu de Negocio Tecnología d'Enerxía y Control de Elinsa-Grupu Amper; Jorge García García, director d'área de Tresferencia y Cátedres d'Empresa de la Universidá d'Uviéu; David Díaz Reigosa y Juan Manuel Guerrero Muñoz, dambos catedráticos del Departamentu d'Inxeniería Eléctrica, Electrónica, de Comunicaciones y Sistemes de la Universidá d'Uviéu; y Santiago Fernández, director de la Fundación Universidá d'Uviéu.