La Universidá d'Uviéu robló güei el conveniu al traviés del cual incorpórase a Quantum Spain, un consorciu compuestu pola Rede Española de Supercomputación y les instituciones d'investigación más piqueres nesti ámbitu, que'l so oxetivu principal ye la creación de la primer infraestructura de computación cuántica d'España. La Universidá d'Uviéu va formar parte de dichu consorciu como una de les instituciones d'investigación y, en concretu, va trabayar nel desenvolvimientu d'algoritmos y d'aplicaciones de la computación cuántica ya intelixencia artificial. 

Al traviés del grupu d'investigación Quantum and High Performance Computing, lideráu pol catedráticu de la área de Ciencia de la Computación ya Intelixencia Artificial José Ranilla Pastor, la universidá va apurrir les sos conocencies en quantum machine learning y optimización de simuladores de circuitos cuánticos para avanzar na conocencia de l'aplicación d'estes tecnoloxíes en campos como'l tratamientu de señales biomédicas y la predicción de patoloxíes cardiovasculares y pulmonares. Amás, la Universidá d'Uviéu va collaborar nes actividaes de formación que s'entamen en redol a Quantum Spain y na puesta en marcha d'infraestructures de simulación d'ordenadores cuánticos en centros tecnolóxicos asociaos a la Rede Española de Supercomputación.

El rector de la Universidá d'Uviéu, Ignacio Villaverde, esplicó que formar parte de Quantum Spain supon para la institución “una reconocencia a los llabores d'investigación y formación, pioneres n'Asturies, que los nuesos profesores vinieron realizando na última década nel campu de la computación cuántica”. Amás, dixo, “va ayudar a maximizar la visibilidá de la Universidá d'Uviéu, según a fomentar la collaboración con otres universidaes y centros d'investigación y a potenciar la tresferencia de conocencia en tecnoloxíes cuántiques al texíu granible”. 

Quantum Spain va dotar al presente ecosistema cuánticu nacional de les ferramientes necesaries para desenvolver un sólidu texíu científico y tecnolóxicu en redol a la computación cuántica y les sos aplicaciones n'Intelixencia Artificial. Impulsada pol Ministeriu d'Economía al traviés de la Secretaría d'Estáu de Digitalización ya Intelixencia Artificial y financiada colos Fondos de Recuperación, la iniciativa busca diseñar, construyir ya instalar un ordenador cuánticu nel Barcelona Supercomputing Center, según impulsar un ecosistema completu de computación cuántica n'España, fomentando la investigación y la formación nestes tecnoloxíes y facilitando l'accesu a recursos de computación cuántica a lo llargo y anchu de too el país. 

Para la Universidá d'Uviéu, los fondos llograos al traviés d'esti conveniu van facer posible, ente otres coses, la formación de nuevos doctores nel campu de la computación cuántica y l'intelixencia artificial, según la organización d'actividaes de formación, investigación y divulgación en redol a estes tecnoloxíes. Yá formen parte del consorciu, amás del Barcelona Supercomputing Center, un total de 10 universidaes, el CSIC y dellos centros d'investigación, toos con papel asemeyáu al que va tener la Universidá d'Uviéu.

Esti grupu d'investigación que va formar parte de la iniciativa, Quantum and High Performance Computing, cuenta con una dilatada esperiencia en computación cuántica ya intelixencia artificial. Dende va dellos años, el grupu collabora viviegamente en proyectos similares a Quantum Spain con instituciones como'l CERN, la Universidá de Cambridge, la Escuela Politécnica Federal de Lausana, la Universidá ETH Zürich, Fundación CTIC o l'Institutu Tecnolóxicu de Castiella y Llión.