Los estudiantes y egresados de la Universidá d'Uviéu van disponer d'un serviciu d'asesoramientu personalizáu, con profesionales cualificaos, para ayudar na busca de trabayu. Esti nuevu serviciu, que forma parte de les ferramientes para l'empléu TalentUO, ye frutu de la collaboración ente'l Vicerrectorado de Tresferencia y Relaciones cola Empresa, al traviés de la Fundación Universidad Uviéu, y el Serviciu Públicu d'Empléu d'Asturies.

Les nueves ferramientes TalentUO fueron presentaes güei na Aula Magna del Edificiu Históricu nun actu que cuntó cola presencia d'Ignacio Villaverde, rector de la Universidá d'Uviéu; Begoña Cueto, vicerrectora de Tresferencia y Relaciones cola Empresa; Enrique Fernández, conseyeru d'Industria, Empléu y Promoción Económica, y Pilar Varela, directora xeneral del Serviciu Públicu d'Empléu del Principáu d'Asturies.

El rector manifestó que la relación y el compromisu de la Universidá d'Uviéu colos sos estudiantes nun termina nel momentu en que conclúin los sos estudios. Villaverde señaló que “les nueves ferramientes pal empléu TalentUO van contribuyir a ameyorar l'insertamientu llaboral de nuesos egresados”. “Estes ferramientes van dexar a los nuesos estudiantes encarar con mayor ésitu la transición de la universidá al mercáu de trabayu, con información sobro enclinos, procesos de selección de personal o xestión de marca personal”, sorrayó. 

La vicerrectora de Tresferencia y Relaciones cola empresa, qu'estimó la collaboración del Serviciu d'Empléu, que financia esta nueva iniciativa, destacó que les nueves ferramientes TalentUO pretenden ser un elementu facilitador p'aportar a los distintos servicios y sofitos al empléu que, tanto la comunidá universitaria como'l texíu empresarial y entidaes rexonales, ponen a disposición del estudiantáu y persones egresadas de la Universidá d'Uviéu”. 

La vicerrectora detalló amás les ferramientes d'empleabilidá que va ufiertar TalentUO:

Información profesional dirixida a que l'alumnáu conoza les salíes profesionales de la so titulación, el mercáu llaboral y les competencies personales y profesionales que demanden les empreses. 
Formación pal empléu en forma de píldores formatives, online y de curtia duración, que van dexar al alumnáu tener una visión xeneral de cómo definir la so estratexa de busca d'empléu, remanar les ferramientes de busca d'empléu y xestionar la so marca personal. 
Asesoramientu individual, presencial o online. Estes sesiones van ser un espaciu d'acompañamientu personalizáu al procesu de busca d'empléu, pal resolvimientu de duldes y l'adaptación de les ferramientes de busca d'empléu al oxetivu profesional personal. 
Asesoramientu grupal presencial, fundamentalmente prácticu, pal desenvolvimientu de competencies y el manexu de ferramientes de busca d'empléu que-yos dexen encarar con ésitu los procesos de selección y xestionar les sos transiciones llaborales.
Eventos de networking diseñaos a midida, como espacios d'intercambiu ente empreses y alumnáu y/o persones titulaes en busca d'empléu, nos que les empreses puedan presentar les sos necesidaes, conocer posibles aspirantes pa cubrir los sos vacantes, y establézanse contactos profesionales.

Ente los recursos que la Universidá d'Uviéu pon a disposición del alumnáu pa favorecer la so empleabilidá, atópense otres ferramientes como'l Foru d'Empléu TalentUO, el programa Suma Talentu, los alcuerdos con empreses pa insertamientu llaboral, l'axencia d'allugamientu o l'alcuerdu d'intercambiu de datos col Serviciu Públicu d'Empléu.