Los investigadores destaquen que ye necesariu ameyorar sustancialmente la eficacia de la evaluación d'impactu ambiental para embrivir l'impactu de les llamaes ‘enerxíes verdes’ sobro la mortalidá de la fauna o la destrucción y degradación de les sos hábitats | El proyectu ta lideráu por investigadores del Institutu Mistu d'Investigación en Biodiversidá de la Universidá d'Uviéu y el CSIC y ta financiáu pola Fundación Biodiversidá
La Universidá d'Uviéu punxo en marcha un proyectu d'investigación que va dexar evaluar los impactos de la enerxía eólica na biodiversidá. Esti proyectu, desenvueltu por miembros del Institutu Mistu d'Investigación en Biodiversidá de la Universidá d'Uviéu y el CSIC y financiáu pola Fundación Biodiversidá, emplega tecnoloxíes de siguimientu remotu de la fauna para contribuyir a embrivir los impactos negativos de los parques eólicos nel mediu ambiente.
Patricia Mateo-Tomás, profesora del Departamentu de Bioloxía d'Organismos y Sistemes de la Universidá d'Uviéu, recuerda que l'adopción de midíes pa lluchar contra'l cambéu climáticu va ganáu relevancia nes axendes polítiques internacionales, que promueven una transición enerxética basada n'enerxíes anovables, como la solar y l'eólica. Mateo-Tomás sorraya que, sicasí y tal que destacaron apocayá los paneles intergubernamentales de cambéu climáticu (IPCC) y biodiversidá (IPBES), combatir el cambéu climáticu nun tien de comprometer otru gran retu de la sociedá como ye detener la perda de biodiversidá.
“A pesar de que les enerxíes anovables sían conocíes como enerxíes verdes, non siempres se consigue compatibilizar el so desenvolvimientu col caltenimientu d'especies y ecosistemes”, afirma la investigadora. Cada vez son más les voces que dende l'academia, l'activismu y la sociedá polo xeneral reclamen una meyor planificación del desenvolvimientu de les enerxíes anovables pa embrivir los sos impactos negativos na naturaleza, que van dende la mortalidá de fauna, sobremanera aves y esperteyos, a la destrucción o degradación de les sos hábitats. Llograr esta compatibilidá rique ameyorar los procedimientos d'Evaluación d'Impactu Ambiental (EIA) que, como asocede con muncha lexislación ambiental, presenten diverses llimitaciones que comprometen la so efectividá. Nesti contestu, dende l'Institutu Mistu d'Investigación en Biodiversidá, investigadores de la Universidá d'Uviéu y el CSIC lideren un proyectu que ta utilizando tecnoloxíes de siguimientu remotu de fauna pa llograr información que dexe embrivir los impactos negativos de los parques eólicos na biodiversidá. “La nuesa pretensión ye apurrir encamientos p'ameyorar la eficacia de los procedimientos qu'evalúen l'impactu ambiental de los parques eólicos, embriviendo los conflictos ente la implantación d'esti tipu d'enerxía y el caltenimientu de la biodiversidá en toles fases del procesu, dende la planificación inicial del so allugamientu hasta la so construcción, funcionamientu y esmantelamientu”, comenta la profesora.
Esta investigación ta financiada pola Fundación Biodiversidá del Ministeriu pa la Transición Ecolóxica y el Retu Demográficu (MITERD) del Gobiernu d'España nel marcu del Plan de Recuperación, Tresformamientu y Resiliencia (PRTR), financiáu pola Unión Europea al traviés del programa NextGenerationEU, y cuenta cola collaboración del Principáu d'Asturies.
Referencia
El proyectu “Rede centinela d'impactos de la enerxía eólica na fauna y el so hábitat: tecnoloxíes de siguimientu remotu de vertebraos p'ameyorar la eficacia de la evaluación d'impactu ambiental” cuenta col sofitu de la Fundación Biodiversidá del Ministeriu pa la Transición Ecolóxica y el Retu Demográficu (MITERD) nel marcu del Plan de Recuperación, Tresformamientu y Resiliencia (PRTR), financiáu pola Unión Europea - NextGenerationEU.
