Ignacio Villaverde, rector de la Universidá d'Uviéu, rindió güei cuentes de la so xestión énte'l Claustru Universitariu. El máximu responsable de la institución académica presentó l'informe de la xestión del cursu 2023-2024 y avanzó tamién los principales oxetivos de la institución que dirixe pal cursu 2024-2025. El rector resumió en cuatro grandes bloques los oxetivos del cursu anguaño a valir: orientación estratéxica; institucionales, normativos y organizativos; investigación tresferencia y profesoráu; formación, estensión ya impactu; ya infraestructures y xestión.

Ente los oxetivos d'orientación estratéxica, Villaverde mentó, ente otros, la necesidá d'evaluar los planes estratéxicos, el desenvolvimientu del nuevu modelu de docencia, la execución de la nueva estructura de relación de puestos de trabayu y l'emburrie a la reordenación de les infraestructures, con especial incidencia nel nuevu Campus d'El Cristu, unu de los proyectos estrella del equipu rectoral. Villaverde detúvose, amás, n'aspeutos como'l desenvolvimientu de la sostenibilidá, l'afitamientu de l'Alianza INGENIUM, el tresformamientu dixital o la xestión proactiva de la investigación.  

Oxetivos institucionales, normativos y organizativos

Villaverde defendió énte los claustrales la necesidá de dar un emburrie a dellos planes que dexen avanzar n'aspeutos claves como la desburocratización, la digitalización o la participación estudiantil. Refirióse tamién al desenvolvimientu de los reglamentos d'evaluación, eméritos, investigación, institutos y centros d'investigación, spin-off y emprendimiento universitariu, y económicu-financieru.

El máximu responsable universitariu resaltó amás que ye necesariu poner en marcha ensin dilación la nueva estructura organizativa. Pa lo que ye necesariu implementar ferramientes como les unidaes d'alministraciones de campus, de comunicación y marketing, de datos, la reestructuración de les biblioteques o l'impulsu del mecenalgu.

Oxetivos n'investigación, tresferencia y profesoráu

La investigación, tresferencia y profesoráu ocupó xuna parte destacada de la intervención del rector énte'l claustru universitariu. Avanzó Villaverde que, mientres esti cursu, va poner en marcha un plan de meyora de resultancies d'investigación y allugamientu nos rankings y va dase un impulsu a la estratexa d'hubs. El rector esplicó coles mesmes dos estructures nueves: la Escuela de Doctoráu y el Centru Internacional de Emprendimiento Tecnolóxicu. 

Oxetivos en formación, estensión ya impactu

Dalgunes de les midíes anunciaes pol rector escuerren ganar impactu social. Villaverde anunció la renovación del Conseyu Asesor, integráu por persones de reconocíu prestíu con fuerte vinculación cola Universidá d'Uviéu, la constitución de Alumnii, con una sociedá de socios y benefactores que vertebren la comunidá d'antiguos alumnos, según la creación d'una Escuela d'Eméritos. 

Oxetivos n'infraestructures y xestión

El rector defendió, ente los oxetivos de xestión, la necesidá de dotar del financiamientu necesariu a centros, departamentos, institutos y centros d'investigación. Mentó tamién énte los claustrales la creación de nueves unidaes alministratives y l'ellaboración d'un plan d'intervención.

Informe de xestión 2023-2024

La presentación de los oxetivos de la universidá pal cursu a valir tuvo precedida pola defensa énte'l claustru del informe de xestión correspondiente al cursu 2023-2024 que, Villaverde, definió como un cursu pal reimpulso. El rector empezó'l so informe destacando trés acontecimientos que marcaron el cursu académicu pasáu: l'aprobación pol claustru de l'adaptación de los nuevos estatutos, la convocatoria adelantrada d'elecciones al Rectoráu y l'entamu de los trámites alministrativos cola Seguridá Social pa la cesión de los espacios ocupaos pol antiguu HUCA y la planificación d'una fonda reestructuración de les infraestructures universitaries.

Villaverde defendió tamién énte'l claustru que mientres el cursu pasáu rexistráronse meyores nos principales indicadores universitarios. Mentó'l rector, ente otres cuestiones, aspeutos como la medría presupuestaria, l'aumentu de los grupos d'investigación y les tesis lleíes o la medría nel númberu de matrícules universitaries.

El máximu responsable universitariu detúvose mientres el so informe de xestión nel desenvolvimientu de les infraestructures que tienen como elementu estrella'l nuevu Campus d'El Cristu. Villaverde, que trazó un percorríu históricu pola ampliación del campus desque'l presidente Barbón avanzó la noticia, destacó que'l nuevu campus “va rematar un proyectu bien naguar por pola institución académica de colmatar los sos espacios n'Uviéu xenerando una exa tresversal na ciudá con dos grandes campus universitarios, El Cristu, al sur y el Milán, al norte, un campus deportivo y residencial en El Catalanes y concentrando el gobiernu universitariu nel centru de la ciudá”. 

Estratexa de internacionalización

El rector resaltó tamién que, mientres el cursu oxeto d'alderique, la universidá asturiana consolidó la so estratexa de internacionalización. Refirióse, en concretu, al aumentu progresivu del númberu d'estudiantes estranxeros matriculaos nos programes oficiales. “Nel cursu 2022-2023 el númberu d'estudiante estranxeros yera de 977. Nel cursu de referencia, 2023-2024, la cifra xubió a 1.065 (nel presente curso, 2024-2025, la cifra volvió alzase, 1.433)”, puntualizó. 

Villaverde resumió en dos les estratexes pa la captación d'estudiantáu internacional: la promoción de programes de posgrado cola participación en feries internacionales y les campañes de comunicación estratéxiques, que se desenvolvieron tanto na Unión Europea como en Llatinoamérica. Mentó tamién el rector el papel de la Universidá na Alianza INGENIUM, nel Real Colexu Complutense en Harvard, na Universidá de Temple o nel Tecnolóxicu de Monterrey.

Personal docente ya investigador y personal d'alministración y servicios

El máximu representante de la Universidá d'Uviéu resaltó que la plantiya del personal docente ya investigador de la Universidá d'Uviéu nes sos distintes categoríes xube a 2.151 persones. La media d'edá del PDI ye de 51,4 años. A lo llargo del cursu 2023-2024 convocáronse –dixo Villaverde-- un total de 386 places de profesoráu. “Nesti momentu, la Universidá d'Uviéu completó la so transición a les nueves figures y dedicaciones del profesoráu previstes na LOSU”, fixo fincapié'l rector.

Polo que respecta a la plantiya de personal técnico de xestión, alministración y servicios, más conocíu poles sos sigles PTGAS, la plantiya ye de 1.055 persones, con una edá media de 53 años. L'equipu rectoral siguió executando los alcuerdos alcanzaos coles organizaciones sindicales y los sos órganos de representación y mentó, en concretu, el rector el desenvolvimientu del reglamentu de teletrabajo.

La participación del estudiantáu

Villaverde defendió nel so informe la necesidá d'amontar la participación del estudiantáu na vida universitaria, xuna asignatura pindia nes instituciones d'enseñanza cimera. El rector recordó, nesti sentíu, que la Universidá d'Uviéu cunta yá con un Plan de Participación Estudiantil. Felicitóse tamién el rector de la medría nel númberu d'estudiantes matriculaos nel contestu d'iviernu demográficu que vive Asturies. En total, nel cursu 2023-2024, la institución académica asturiana sumó 20.683 estudiantes de grau y posgrado, de los que 17.120 yeren de grau (987 d'ellos nos dobles graos), 1.905 de máster y 1.658 de doctoráu. Indicó tamién el máximu responsable que xuna máxima del so equipu de gobiernu ye que naide se quede tras por razones económiques polo que la universidá realizó un esfuerzu importante en política de beques.

Xuna amplia ufierta académica

La Universidá d'Uviéu xestionó un total 56 graos y 7 dobles graos, 61 másteres, 1 doble máster y 6 másteres Erasmus Mundus y 70 títulos propios. El rector fixo fincapié n'unu de los finxos llograos mientres el cursu pasáu pa la incorporación nel presente curso de dos nuevos graos naguaos pola comunidá universitaria: Ciencies de l'Actividá Física y del Deporte y Criminoloxía.

L'esfuerzu n'Investigación y tresferencia

Villaverde punxo en valor el trabayu realizáu pol Vicerrectorado d'Investigación p'ameyorar la xestión de l'actividá investigadora. El rector mentó, en concretu, qu'el vicerrectorado reestructuró les sos direcciones d'área y reforzóse cola incorporación de 6 persones más y 2 persones a la Oficina de Proyectos Europeos. Indicó tamién Villaverde que la universidá asturiana collechó un notable ésitu nes convocatories nacionales d'atracción de talentu (programes ATRAI, Ramón y Cajal y Beatriz Galindo).

Amás, la meyora y intensificación de la tresferencia de resultancies foi ensin dulda xuno de los oxetivos estratéxicos del equipu rectoral. A manera d'exemplu, Villaverde mentó l'I Foru de Tresferencia de la Universidá d'Uviéu onde participaron 24 grupos d'investigación y 30 empreses ya instituciones. “Non cabo dulda de que nuesa meyor tresferencia son nuesos egresados”, indicó'l rector, que recordó les altes tases d'empleabilidá de los estudiantes de la Universidá d'Uviéu. 

El rector terminó'l so informe de xestión animando a la comunidá universitaria a encarar los nuevos tiempos que, según dixo, prevense difíciles. “Toi convencíu de que tamos na sienda correcto y fayadizo”, dixo. “La Universidá d'Uviéu, que ye y va ser la universidá pública d'Asturies, va desempeñar un papel protagonista indiscutible nesa nueva Asturies qu'ente toos y toes tamos construyendo”, concluyó.