Nun apueste pol espardimientu llibre del conocimientu y pola ecoloxía, la revista "Lletres Asturianes" abandona la edición impresa dende'l númberu 122 (marzu 2020) y entama a asoleyase namái n'edición electrónica de consulta abierta na plataforma REUNIDO de la Universidá d'Uviéu: https://www.unioviedo.es/reunido/index.php/Lletres  

 

Amás, caltiénse nes mesmes plataformes onde s'alluga dende'l númberu 105 (2011):  

 

- La páxina web de la revista: www.lletresasturianes.com 

 

- La páxina web de l'Academia de la Llingua Asturiana: www.academiadelallingua.com/lletresasturianes 

 

L'Academia de la Llingua Asturiana, como responsable editorial, lo mesmo que munches otres entidaes de calter asemeyáu, tomó determín nesti sen llueu d'un tiempu de reflexón posada sobre esta cuestión. Con ello, Lletres Asturianes da un nuevu pasu alantre na so historia p'actualizase y adautase a les tendencies editoriales que nos caberos tiempos vienen aconseyando la sustitución del formatu impresu pol mediu electrónicu. Llógrase asina una revista de munchu mayor algame y na que l'accesu llibre a los conteníos ufiertará una disponibilidá total de consulta. 

 

La previsión ye xubir los conteníos d'esti númberu de la revista a les plataformes citaes nos próximos díes, calteniendo asina la periodicidá yá afitada (semestral, meses de marzu y ochobre).