La cultura asturiana ye rica y tien abondos raigaños na historia. La ufierta cultural del Principáu inclúi xoyes como l'arquitectura del arte Prerrománicu asturianu, les cueves arte rupestre paleolíticu o les icnites del Xurásicu que tienen los acantilaos de la costa asturiana, que s'atopen ente les más importantes d'Europa.

Una de les ayalgues arquitectóniques mundiales ye'l Prerrománicu asturianu, integráu por dellos templos que fueron declaraos pola UNESCO Patrimoniu de la Humanidá. A estos monumentos súmase tamién la Catedral d'El Salvador n'Uviéu, parada imprescindible nel Camín de Santiago, que guarda nel so interior l'ayalga de la Cámara Santa.

El patrimoniu cultural asturianu ta repletu de tradiciones lligaes a la vida nel campu, sones musicales tradicionales y con un ricu imaxinariu de personaxes y narraciones orales y escrites, amás de dos llingües propies, l'asturianu y el gallegu asturianu, que tienen tamién cabida nel sistema educativu.

Asturies ye una rexón dinámica, qu'axunta una ambiciosa ufierta cultural pa satisfacer toles sensibilidaes. La Universidá d'Uviéu xuega un papel protagonista nesti sentíu al traviés de les actividaes entamaes dende la so Estensión Universitaria, siempres de calter universal y gratuitu pa tola sociedá asturiana.

Cinco cueves paleolítiques con pintures rupestres y el conxuntu de monumentos del Prerrománicu asturianu cunten cola declaración de Patrimoniu de la Humanidá pola UNESCO.

La vida cultural asturiana ufierta una completa axenda na que destacaríen acontecimientos internacionales como la entrega de los Premios Príncipe d'Asturies. Los principales teatros de la rexón: Campoamor (Uviéu), Xovellanos (Xixón) y Palacio Valdés (Avilés) disponen d'una ambiciosa programación de teatru, conciertos, ópera y danza que se complementa cola ufierta del Muséu de Belles Artes, el Centru Internacional Niemeyer, Llaboral Centru d'Arte y la cita añal del Festival Internacional de Cine de Xixón.

La nómina de fiestes populares y tradiciones ye bien amplia y dexa ver al visitante'l calter del pueblu asturiano, que mantien entá vezos y costumes que, n'ocasiones, remóntense sieglos.

Una gastronomía rica y variada

La gastronomía asturiana ye rica y bien tradicional. El platu más emblemáticu de la rexón son les fabes, acompañaes pola sidra, la bebida por escelencia nel Principáu. La gastronomía rexonal ye rica en variedá de pexes y mariscos, carnes d'escelente calidá y bonos productos de la güerta.

L'arroz con lleche, les casadielles y los frixuelos son dalgunes de les delicies gastronómiques que se pueden probar como postre. La producción de quesos ye otru de los atractivos pal cielu la boca, con decenes de variedaes de producción artesanal.