Tradición y modernidá en más de 400 años d’historia
La Universidá d'Uviéu, la institución académica d'enseñanza superior del Principáu d'Asturies, atesora yá más de 400 años d'historia. El so Edificiu Históricu, na capital asturiana, foi testigu d'acontecimientos tan memorables como la Revolución Francesa o la Guerra Civil española. Les sos columnes guarden tovía los restos de la metralla de la guerra qu'enfrentó a los españoles ente 1936 y 1939. La Universidá d'Uviéu foi amás precursora d'un movimientu llamáu a cambiar los cimientos de la educación. La Estensión Universitaria, qu'asina se denominó, surdió na Universidá d'Uviéu cola perda de les colonies españoles n'América. Los profesores que dieron orixe a esta plataforma fueron conscientes del poder lliberador de la educación y de la necesidá d'estender la formación acullá de les muries de la Universidá pa instruyir aquellos estamentos sociales con menos capacidá económica. Estos docentes, integraos nel Grupu d'Uviéu, fueron amás la meyor ponte d'unión con América. L'intelectual Rafael Altamira y Crevea, comisionáu pola Universidá d'Uviéu, organizó en 1909 un viaxe institucional per Arxentina, Chile, México, Perú, Cuba, Uruguái y Estaos Xuníos pa restablecer les relaciones académiques y intelectuales ente América y España, orixe de la movilidá ente dambos continentes que sigue tovía güei.
Pero la Universidá d'Uviéu ye muncho más que la so historia. Ye una institución nueva con tol futuru per delantre. Peles sos modernes instalaciones, asitiaes en distintos puntos del Principáu d'Asturies, pasen cada añu miles d'estudiantes, profesores, investigadores y personal d'alministración y servicios que convierten la institución na principal factoría del conocimientu d'Asturies y una de más más destacaes d'España. Sirva d'exemplu que’l 80 por cientu de la investigación que se fai n'Asturies lleva la marca de la Universidá d'Uviéu. Les sos árees de conocimientu, tan amplies como variaes, dexen a quien escueye la Universidá d'Uviéu pa formase, especializase en disciplines tan distintes como'l griegu clásicu o'l big data. Los estudiantes que pasaron peles sos aules ocupen güei puestos de responsabilidá n'instituciones y empreses non solo d'España, sinón del mundu.
