Ignacio Villaverde, rector de la Universidá d’Uviéu
Ignacio Villaverde, rector de la Universidá d'Uviéu, ye caderalgu de Derechu Constitucional de la institución académica asturiana. La so trayectoria profesional ta íntimamente relacionada cola Universidá d'Uviéu na que desempeñó diversos cargos. Villaverde foi secretariu del Departamentu de Derechu Públicu, secretariu xeneral, vicerrector de Coordinación, Comunicación y Relaciones Institucionales y secretariu del so Conseyu Social. L'actual rector ye amás miembru de la Xunta Directiva de l'Asociación de Constitucionalistes d'España y el coordinador del ciclu de conferencies y seminarios agospiaos pola Xunta Xeneral del Principáu y la Universidá d'Uviéu: "Espaciu Fundamentu. Modelos constitucionales a debate".
Miembru fundador del Grupu d'Escelencia "DERECONS" y sociu constitutivu de l'Asociación de Constitucionalistes d'España, a la que pertenez a la xunta dende 2013. Villaverde tien amás una dilatada trayectoria como investigador. Participó n'ocho proyectos nacionales y unu européu. Ye autor, amás, de dellos llibros y numberosos artículos científicos en revistes nacionales y estranxeres sobre derechos fundamentales, llibertá d'espresión y información y derechu a ser informáu, derechu a la intimidá, al honor, protección de datos, tresparencia, xusticia constitucional y organización territorial del Estáu. Nos últimos tiempos, empezó una llínea d'investigación sobre Teoría de la Constitución y el Constitucionalismu líquidu. Impartió numberosos cursos, seminarios y conferencies n'España y fuera d'España sobre eses materies. Editor y revisor de delles revistes científiques, foi evaluador de proyectos estatales d'investigación, profesor convidáu na Universidá Albert Ludwig de Friburgo, la London School of Economics and Politics, La Sapienza de Roma, el Departamentu de Derechu Constitucional de la Universidá de Florencia y, apocayá, nel Institutu Max Planck de Derechu Públicu Comparáu y Internacional d’Heidelberg.
Tamién desenvolvió una amplia carrera profesional. Foi Lletráu del Tribunal Constitucional, director de l'Asesoría Xurídica del Conceyu de Xixón, conseyeru del Conseyu de la Comunicación del Principáu d'Asturies y asesoró diverses sociedaes privaes y públiques en protección de datos, publicidá y tresparencia y xusticia constitucional.
