La Facultá de Comerciu, Turismu y Ciencies Sociales Xovellanos de Xixón imparte estudios universitarios relacionaos cola xestión d'empreses y organismos públicos, especialmente nos ámbitos comercial, turísticu y de l'alministración estatal. Tamién se traten los estudios de trabayu social.

La facultá, antes Escuela Universitaria Xovellanos de Xixón, foi fundada en 1899 y axunta tola formación relacionada colos estudios sociales (trabayu social) y de xestión (nel ámbitu empresarial, turísticu y de l'alministración estatal) de la Universidá d'Uviéu nel Campus de Xixón.

Ta nel Campus Tecnolóxicu-Empresarial de Xixón, onde ocupa un sitiu privilexáu dientro de la Llaboral, Ciudá de la Cultura. Nes sos instalaciones cunta con 40 aules y 11 Seminarios-Sales de Xuntes, espacios toos ellos colos más modernos medios audiovisuales (ordenador, videu proyector, pantalla y accesu a internet), 6 Aules d'Informática (con unos 144 ordenadores) pa clases práctiques, 3 aules d'Informática abiertes permanentemente al alumnáu (con 76 ordenadores) y una magnífica biblioteca con capacidá pa más de 60.000 volúmenes y más de 200 puestos d'estudiu, distribuyíos a lo llargo de 3 pisos, n'amplios espacios abiertos, a los que se añeden dos sales zarraes pa trabayos en grupu (de 10 y 20 puestos). Tamién dispón d'un Paraninfu pa conferencies, celebraciones y otros actos con 150 asientos.