La Escuela Politécnica d'Inxeniería de Xixón nació nel añu 2010 a partir de la fusión de los Centros qu'impartíen les titulaciones d'Inxeniería Industrial, Informática y Telecomunicación –y d'Inxeniería Técnica de les mesmes rames. Na actualidá, imparte graos y másteres d'estes rames, incluyendo los másteres que dan accesu al exerciciu de los correspondientes oficios regulaos. Más en concreto, la escuela ufierta los graos en Ciencia y Inxeniería de Datos, Inxeniería d'Organización Industrial, Inxeniería Eléctrica, Inxeniería Electrónica Industrial y Automática, Inxeniería Química Industrial, Inxeniería Mecánica, Inxeniería de Tecnoloxíes Industriales, Inxeniería Informática en Tecnoloxíes de la Información y Inxeniería de Tecnoloxíes y Servicios de Telecomunicación. Amás, imparte tamién másteres en Conversión d'Enerxía Eléctrica y Sistemes de Potencia, n'Inxeniería Mecatrónica, n'Inxeniería Enerxética, n'Inxeniería de Telecomunicación, n'Inxeniería d'Automatización y Informática Industrial, n'Inxeniería Industrial, n'Inxeniería Informática y Erasmus Mundus n'Inxeniería Mecatrónica.

La Escuela ta asitiada na Milla del Conocimientu de Xixón, un espaciu xeográficu nel que se concentren, amás de les mesmes instalaciones de la Universidá d'Uviéu, el Parque Científicu y Tecnolóxicu de Xixón, Llaboral Ciudá de la Cultura, el Xardín Botánicu y l'Hospital Universitariu de Cabueñes.

El centru tien certificada pola ANECA la implantación d'un sistema d'aseguramientu de calidá conforme al programa AUDIT empobináu a la meyora continua de la formación de los estudiantes, Certificáu Nº UCR-I 050/2020. Amás, el 10 de marzu de 2020, el Conseyu d'Universidaes aprobó l’Acreditación Institucional del Centru.