El trabayu evalúa'l diseñu más apropiáu para llograr tases más precises en función de la especie oxeto d'estudiu, la disponibilidad de recursos económicos y humanos, y les característiques de la área xeográfica | Les resultancies llográronse combinando más de 10.000 simulaciones computacionales y un esperimentu de campu realizáu nel Parque Nacional de Cabañeros nel que s'asitiaron 96 cámares de fototrampeo | Los científicos sorrayen qu'ameyorar los protocolos d'actuación ye prioritariu para amenorgar la incertidume de les estimaciones finales y, d'esta miente, aumentar la fiabilidá de los programes de caltenimientu y xestión de la fauna montesa | L'estudiu, realizáu en collaboración col Institutu d'Investigación en Recursos Cinexéticos (IREC), el Centru d'Investigación en Modeláu Ecolóxicu y Ambiental (CREEM), y l'Universidá de Ciencies Agraries de Suecia (SLU), foi publicáu na revista ‘Journal of Applied Ecology’
El fototrampeo --usu de pequenes cámares fotográfiques que s'activen automáticamente cuando un animal pasa per delantre d'elles-- ye una ferramienta llargamente utilizada para'l siguimientu de fauna, especialmente mamíferos y aves terrestres. Investigadores de la Universidá d'Uviéu evaluaron distintos protocolos que van dexar llograr tases de detección más precises nos estudios realizaos con estes cámares. L'estudiu foi publicáu na revista Journal of Applied Ecology, de máximu impactu na so área de la conocencia.
El investigadores analizaron cómo, a partir del númberu d'individuos detectaos en cada cámara (tasa de detección), derívense distintos parámetros ecolóxicos como'l númberu total d'individuos na población (bayura), la so distribución (ocupación), o les interacciones con otres especies. El autores del trabayu sorrayen qu'ameyorar los protocolos para llograr tases de detección más precises ye prioritariu para amenorgar la incertidume de les estimaciones finales y, d'esta miente, aumentar la fiabilidá de los programes de caltenimientu y xestión de la fauna montesa.
L'impactu del númberu de cámares y la so movilidá
Pablo Palencia, investigador del Departamentu de Bioloxía d'Organismos y Sistemes de la Universidá d'Uviéu nel Institutu Mistu d'Investigación en Biodiversidá (IMIB), esplica les principales resultancies llograes pol estudiu. El investigadores comprobaron que, cuando se cunta con un baxu númberu de cámares de fototrampeo, camudar el so allugamientu mientres el periodu d'estudiu aumenta la precisión de les tases de detección nun 19% al monitorizar especies como'l venáu o'l xabalín, pero nun ameyora la precisión n'especies que frecuentemente se mueven per caminos como'l foín, el llobu cerval o'l llobu.
Esti investigador sorraya, amás que, cuando'l númberu de puntos de muestreo caltiense constante mientres tol periodu de siguimientu, asitiar trés cámares en cada unu d'esos puntos amonta la precisión de la tasa de detección nun 31% con al respective de l'allugamientu d'una única cámara. “Más allá del númberu de cámares disponibles, les característiques de la especie d'interés (principalmente la so bayura y distribución nel espaciu), les característiques de la área d'estudiu (accesibilidá), y la disponibilidad de recursos humanos y materiales son trés factores clave a la de diseñar l'estudiu”, manifiesta Palencia. Les resultancies d'esti trabayu llográronse a partir de más de 10.000 simulaciones computacionales (modelos matemáticos), y de un esperimentu de campu realizáu nel Parque Nacional de Cabañeros nel que s'asitiaron 96 cámares de fototrampeo y analizáronse les tases de detección de venáu, xabalín, corzu, foín, foina, melandru, llebre y perdiz.
El trabayu foi lideráu pol Institutu Mistu d'Investigación en Biodiversidá (IMIB), integráu pola Universidá d'Uviéu, el Conseyu Cimeru d'Investigaciones Científiques y el Principáu d'Asturies. Cuntó, amás, cola collaboración d'un equipu internacional formáu por investigadores del Institutu d'Investigación en Recursos Cinexéticos (IREC - España), la Universidá de St. Andrews (Escocia) el Centru d'Investigación en Modeláu Ecolóxicu y Ambiental (CREEM - Portugal), y l'Universidá de Ciencies Agraries de Suecia (SLU - Suecia).
Referencia
Palencia, P., Sereno‐Cadierno, J., Carniato, D., Marques, T., Hofmeester, T. R., Vicente, J., & Acevedo, P. (2024). Clustered and rotating designs as a strategy to obtain precise detection rates in camera trapping studies. Journal of Applied Ecology. DOI: 10.1111/1365-2664.14690
