Estes obres van sirvir para estabilizar l'inmueble, un pasu previu necesariu para siguir cola so rehabilitación total n'una fase posterior | El presupuestu de llicitación supera llixeramente los 533.000 euros y el plazu d'execución de los trabayos va ser de siete meses | La hestoria de les Colonies Escolares de Salinas ta bien amestada a la Universidá d'Uviéu, por ser dellos profesores de la institución académica el precursores de la idea
La Xunta de Colonies Escolares sacó a llicitación les obres d'afitamientu del edificiu de Colonies Escolares de Salinas, nel conceyu de Castrillón, con un presupuestu base 533.668 euros. L'oxetivu ye frenar el deterioru del inmueble y el peligru de derrumbe que causó'l pasu del tiempu y el continuu vandalismo del que ye oxetu.
Esta meyora llega dempués de que'l pasáu añu la llicitación para la rehabilitación quedara erma, lo qu'obligó a la Xunta a replantegar les obres debíu a la medría del costu nos materiales de construcción. Amás, quepe recordar que los recursos de l'Asociación Xunta de Colonies Escolares son llindaos, lo que torga sufragar unes obres de gran magnitú.
Con esta nueva llicitación, pretende consolidase y estabilizar l'edificiu, para siguir con posteriores intervenciones que rematen cola rehabilitación completa de la finca, siguiendo, sía que non, los requerimientos a los que s'atopa suxetu al tratase d'un bien incluyíu nel Inventariu del Patrimoniu Cultural d'Asturies.
Dende l'entamu del proyectu, la Universidá d'Uviéu y el Conceyu de Castrillón, instituciones que formen parte de la Xunta de Colonies al traviés de los sos representantes, qu'ostenten la Presidencia y Vicepresidencia, respectivamente, trabayaron conjuntamente para recuperar l'emblemáticu edificiu.
El rector de la Universidá d'Uviéu y presidente de l'Asociación Xunta de Colonies Escolares, Ignacio Villaverde, esplicó que “l'oxetivu prioritariu ye salvar l'edificiu de Salinas al traviés d'estes obres d'afitamientu para, darréu, poder empecipiar una rehabilitación completa que dignifique esti emblemáticu inmueble y pueda da-y un nuevu usu”.
La hestoria de les Colonies Escolares de Salinas ta bien amestada a la Universidá d'Uviéu, por ser dellos profesores de la institución académica el precursores de la idea, y a Castrillón, al escoyer aquellos l'arenal de Salinas para construyir l'edificiu, pol que pasaron neños y neñes de dellos conceyos d'Asturies mientres los branos de 1914 a 1984. Ellí esfrutaben d'un llugar sele y de un modelu pedagóxicu amestáu a la llibre enseñanza.
