Dambes entidaes roblaron esta mañana un protocolu de collaboración para trabayar en programes d'interés común enfocaos al desenvolvimientu sostenible y la transición dixital y verde | El conveniu con CTIC va desenvolvese al traviés del Centru Universitariu d'Investigación y Desenvolvimientu de l'Agua, CURIA | La vicerrectora d'Investigación, Irene Díaz, y el director xeneral de CTIC, Pablo Coca, sellaron l'alcuerdu y destacaron l'esfuerzu de dambes entidaes para encarar dende la ciencia y la tecnoloxía grandes retos como l'escosamientu de los recursos naturales
La Universidá d'Uviéu y CTIC Centru Tecnolóxicu xunen esfuerzos para impulsar proyectos d'investigación aplicada venceyaos a un usu eficiente de la enerxía y l'agua, para'l desenvolvimientu sostenible y la transición dixital y verde. L'alianza foi ratificada esta mañana nel Centru Universitariu d'Investigación y Desenvolvimientu de l'Agua (CURIA), asitiáu nel Campus de Mieres. Na firma participaron la vicerrectora d'Investigación, Irene Díez, y el director xeneral de CTIC, Pablo Coca, según parte del equipu investigador de dambes entidaes.
L'alcuerdu establez el desenvolvimientu de programes y proyectos d'interés común nel que dambes entidaes participen al traviés de proyectos y procesos d'innovación tecnolóxica ya investigación, para impulsar proyectos d'investigación aplicada venceyada a un usu eficiente de la enerxía y l'agua.
La vicerrectora d'Investigación de la Universidá d'Uviéu, Irene Díaz, destacó los esfuerzos de la institución académica para encarar dende la ciencia y la tecnoloxía retos como l'escosamientu de los recursos naturales. Un aspeutu qu'enceta'l CURIA dende Mieres, convertíu yá en “un exemplu de trabayu multidisciplinar y cooperación ente universidá y empresa pa impulsar la investigación, la innovación y el desenvolvimientu d'aplicaciones p'ameyorar la xestión de l'agua tanto n'España como a nivel européu”.
Pela so parte, el director xeneral de CTIC, Pablo Coca, manifestó que “esta alianza ye un bon exemplu de collaboración ente dos axentes relevantes del ecosistema asturianu de ciencia, tecnoloxía ya innovación, que ye precisamente xuno de los oxetivos que recueye'l proyectu de Llei de Ciencia, Tecnoloxía ya Innovación que se ta aldericando estes selmanes na Xunta del Principáu d'Asturies. Tenemos esperiencies previes de collaboración con grupos de la Universidá d'Uviéu que fueron bien esitoses. Para CTIC ye fundamental una y bones nos dexa llevar a la práctica la nuesa especialización en tecnoloxíes del datu ya intelixencia artificial. Nesti casu, la collaboración de los nuesos investigadores colos del CURIA va dexanos xunir fuerces pa encetar los importantes retos que tien la nuesa rexón en materia d'enerxía, agua ya impulsu de la economía del datos, toos ellos recoyíos na estratexa d'especialización intelixente d'Asturies (S3 Asturies 2021-2027)”.
Ente los oxetivos del conveniu de collaboración entre CTIC y CURIA ta identificar oportunidaes de financiamientu pa proyectos conxuntos d'innovación nel ámbitu rexonal, nacional ya internacional. Amás, la collaboración inclúi'l desenvolvimientu conxuntu d'esperimentos que rican d'infraestructures singulares como'l sandbox de Ruraltech o los equipamientos pa pruebes hidráuliques de CURIA. Ente los oxetivos del alcuerdu tán impulsar la participación de CURIA como sociu nos proyectos europeos qu'anguaño CTIC tien en marcha venceyaos a usu eficiente de recursos naturales y optimización de mercaos enerxéticos; esquizar les opciones qu'ufierten les tecnoloxíes venceyaes a la Intelixencia Artificial en relación a la xestión eficiente y sostenible de l'agua y desenvolver acciones conxuntes de divulgación científica y a la ciudadanía polo xeneral pa la capitalización de les resultancies derivaes de les investigaciones realizaes de forma conxunta.
Pa desenvolver esti alcuerdu de collaboración, CTIC, Centru Tecnolóxicu apurre la so especialización en tecnoloxíes alliniada cola doble transición, verde y dixital, incluyida nes prioridaes de la Comisión Europea pal periodu 2021-2027, según del Foru Económicu Mundial: Empresa 5.0; Desenvolvimientu Sostenible; Desenvolvimientu Territorial; Avieyamientu Activu, Salú y Bienestar y Economía del Datu. Suma, coles mesmes, el so dominiu de territorios intelixentes, con especial atención al mediu rural y al desafíu plantegáu pol retu demográficu enfocáu al cambéu social y al impactu socioeconómico de la transición ecolóxico y dixital.
Tou ello complementáu col centru especializáu n'intelixencia territorial y tecnoloxíes pal mediu rural, CTIC RuralTech, onde desenvuelve un llaboratoriu d'innovación y esperimentación estendíu nel territoriu nel valle de Pion, que se convierte nuna redolada d'esperimentación ya innovación tecnolóxica con tecnoloxíes disruptivas, ufiertando un bancu de pruebes pa tecnoloxíes innovadores aplicaes a tolos axentes que interactúan nun espaciu xeográficu concretu; persones, recursos naturales, actividaes económiques, etcétera.
La esperiencia de CTIC se incardina col oxetivu del Centru Universitariu d'Investigación y Desenvolvimientu de l'Agua (CURIA), en que'l so senu trabaya un equipu d'investigación multidisciplinar compuestu por personal de distintos departamentos de la Universidá d'Uviéu amás d'entidaes públiques y privaes. La so actividá va tar centrada nel campu de la planificación y xestión de l'agua como recursu, en toles sos aguaes, al traviés del desenvolvimientu de proyectos d'investigación aplicada y del asesoramientu científicu-técnicu a les alministraciones públiques y empreses. CURIA tien, ente otros fines, la investigación aplicada y el sofitu científicu técnicu a les empreses na planificación y xestión de l'agua, a la que va dar respuesta con esta collaboración con CTIC.
