El Gobiernu d'Asturies y el Ministeriu de Ciencia van cofinanciar la contratación de 57 profesores y profesores ayudantes doctores | El programa nacional María Goyri supon una inversión de 14 millones d'euros en seis años y escuerre amenorgar la precariedá y remocicar la plantiya docente | Villaverde destaca que, cola firma del alcuerdu, la universidá pública reafita'l so compromisu cola sociedá | La ministra Diana Morant visita la biblioteca del Edificiu Históricu, acompañada pol rector, y caltien un alcuentru cola investigadora Noemí Pinilla, beneficiaria del programa ATRAE
La Universidá d'Uviéu ye la primer institución académica d'enseñanza cimera en xuntase al programa nacional María Goyri, d'incorporación de talentu docente ya investigador de les universidaes públiques españoles. El plan supon una inversión de más de 14 millones en seis años para la contratación de 57 profesores y profesores ayudantes doctores.
La firma del conveniu de collaboración a trés bandes nel que participaron güei el presidente del Principáu, Adrián Barbón; la ministra de Ciencia, Innovación y Universidaes, Diana Morant, y el rector de la Universidá d'Uviéu, Ignacio Villaverde, supon l'entamu del nuevu programa, qu'escuerre, ente otros fines, l'amenorgamientu de la precariedá y el remocicamientu de les plantiyes docentes.
El Ministeriu de Ciencia va apurrir 7,7 millones nos próximos seis años y el Principáu va asumir abargana de 6,3 pa cubrir les necesidaes docentes derivaes de la implantación de la Llei Orgánica del Sistema Universitariu (LOSU).
Esti alcuerdu contribúi a amenorgar la temporalidá ente'l personal ayudante doctor y a incorporar y retener talentu, un oxetivu clave pal Gobiernu d'Asturies. Amás, dexa ampliar la plantiya de la institución académica, una y bones estes places tán al marxe de la Ufierta Pública d'Empléu (OPE).
La figura d'ayudantes doctores ta venceyada xeneralmente a mozos docentes ya investigadores nos primeros años de la so carrera académica, polo que ye un programa clave pa contribuyir al remocicamientu del personal de la Universidá d'Uviéu.
Nel desenvolvimientu del plan n'Asturies, el ministeriu fadrá cargu del costu de la incorporación de 34 docentes y el Principáu d'otros 23. Les contrataciones van empezar a realizase a partir d'este mesmu cursu, con una duración de seis años.
En tol país, el programa implica la contratación de barganal de 3.400 docentes, con una inversión añal de 150 millones.
Villaverde destacó que, con esti alcuerdu, "non solo apostamos pola excelencia académica, sinón que reafitamos el compromisu de la universidá pública cola sociedá, porque esti programa garantiza la estabilidá d'estos nuevos profesores mientres seis años, lo que-yos dexará desenvolver se dafechu tanto nel ámbitu docente como nel investigador".
Visita a la Universidá d'Uviéu
Con ocasión de la firma d'esti conveniu, Diana Morant visitó la Biblioteca Central del Edificiu Históricu. Morant, que robló nos llibros d'honor de la universidá y de la biblioteca, tuvo acompañada pol rector, ente otres autoridaes, y tuvo ocasión de conocer y caltener una curtia entrevista con Noemí Pinilla, investigadora de la Universidá d'Uviéu, beneficiaria d'esti programa ATRAE, que financia tamién el Ministeriu de Ciencia.
Morant pudo conocer de la mano de Fausto González, director de la Biblioteca Universitaria, y de María José Ferrer, responsable de la Biblioteca Central, esti espaciu allugáu nel Edificiu Históricu de la institución académica. La ministra y el rector tuvieron tamién acompañaos de parte del equipu rectoral. Tuvieron presente Pedro Alonso, vicerrectorado de Polítiques del Profesoráu y Ordenación Académica; Irene Díaz, vicerrectora d'Investigación; Alfonso López Muñiz, vicerrector d'Estudiantes y Empleabilidá; Ángel Espiniella, secretariu xeneral; Marce Fernández-Raigoso, delegáu del Rector pa la Coordinación y Relaciones Institucionales, y José Antonio Díaz Llagu, xerente.
