El Grupu 9 d'Universidaes (G-9) abre'l próximu llunes el procesu d'inscripción nel novedosu Plan online de Formación del Profesoráu Universitariu Novel. Esta iniciativa va en sintonía col artículu 78 de la Llei Orgánica del Sistema Universitariu (LOSU) y encamienta al profesoráu ayudante doctor de nuevu ingresu a cursar formación pedagóxica inicial. La ufierta formativa cuenta con 18 cursos y entámase en redol a cuatro categoríes: formación para formadores online, metodoloxía para la educación dixital, materiales y recursos educativos dixitales y evaluación para l'aprendizaxe. 

El procesu d'inscripción va permanecer abiertu hasta'l 23 de setiembre, a les 14:00 hores, al traviés de la web del G-9, rellenando'l correspondiente formulariu. Ufiértense un total de 990 places y l'almisión va ser por orde d'inscripción y adscripción a la universidá. Cada estudiante va poder inscribise nun máximu de 4 cursos, anque solo va poder ser almitíu nun cursu de 2 ECTS o en dos de 1 ECTS. 

Refuerzu del ecosistema educativu

Esti plan formativu va buscar incentivar les habilidaes del profesoráu novel y fortalecer pontes ente les universidaes miembru del Grupu 9. Esta collaboración va reforzar l'ecosistema educativu, aprovechando la tecnoloxía y los recursos compartíos de les universidaes participantes p'alzar la calidá de la educación cimera. 

El proyectu reflexa'l compromisu del G-9 cola innovación y la formación continua, garantizando que los y les docentes cunten con toles ferramientes y recursos necesarios pa ufiertar una educación actualizada y de vanguardia.