Sofitar y facilitar la creación d'empreses spin-off per parte d'investigadores y doctorandos de la Universidá d'Uviéu. Este l'oxetivu principal de RADAR Lab, una iniciativa qu'ufierta un programa formativu y d'acompañamientu personalizáu a grupos d'investigación de la institución académica para la constitución de spin-off. Esti tipu d'empreses tán promovidas por miembros de la comunidá universitaria y caracterícense por basar la so actividá na esplotación de nuevos procesos, productos o servicios, a partir de la conocencia adquirida y les resultancies llograes na mesma universidá.

El programa RADAR Lab foi presentáu esta mañana, con ocasión de la celebración del Día de la Universidá na Feria Internacional d'Amueses d'Asturies (FIDMA), por Ignacio Villaverde, rector de la institución académica, y Borja Sánchez, conseyeru de Ciencia, Empreses, Formación y Empléu.

El fin d'esta primer edición de RADAR Lab, que va desenvolver el Principáu al traviés del Centru Européu d'Empreses ya Innovación del Principáu d'Asturies (CEEI Asturies), ye escoyer cinco escurres, presentaes por grupos d'investigación de la Universidá d'Uviéu, que puedan llegar a convertise n'empreses. El plazu para formalizar les propuestes per parte de los distintos equipos ta abiertu hasta'l 25 de setiembre. Mientres ochobre, va tener llugar la formación y. ente payares y febreru, l'asesoramientu individualizáu, pa concluyir col programa en marzu.

Ignacio Villaverde, qu'animó a los grupos d'investigación de la universidá a participar na iniciativa, destacó que la tresferencia de la conocencia forma parte del ADN de la universidá al pie de la docencia y l'investigación. El rector sorrayó que la tresferencia constitúi unu de les exes estratéxiques del so equipu de gobiernu, hasta'l puntu de que mientres el so primer mandatu dióse-y el máximu rangu cola creación del Vicerrectorado de Tresferencia y Relaciones cola Empresa. Villaverde esplicó tamién que, mientres estos años, fortaleciéronse de forma bien importante les relaciones cola empresa hasta llegar a 500 alcuerdos de collaboración con distintes compañíes y amontar el númberu de cátedres d'empresa hasta algamar les 44.

El máximu responsable de la institución académica, qu'estimó la collaboración del Principáu, aseguró que RADAR Lab constitúi un pasu más nel sofitu de la Universidá d'Uviéu al texíu granible asturianu y fixo fincapié na implicación de la universidá nel tresformamientu d'esti texíu, cola creación de nuevos modelos de negociu y la xeneración d'empléu. Nesti contestu, Villaverde mentó amás que, col propósitu de que'l talentu que emana de la universidá repercuta nella, el so equipu tomó la decisión de participar nel accionariado de trés spin-off: Plexigrid, Enfasys y PlaBiTe.

Borja Sánchez, pela so parte, punxo de relieve la importancia d'esta iniciativa de la mano de la Universidá d'Uviéu, que va ayudar a amontar l'impactu de les resultancies de proyectos d'investigación que puedan convertise nun negociu rentable, y va fomentar, amás, el emprendimiento na comunidá científica.

Mesa redonda ‘Entamar dende la Ciencia y la Tecnoloxía’

Tres la presentación del programa, la Universidá d'Uviéu y el CEEI desenvolvieron xuna mesa redonda sol títulu Entamar dende la Ciencia y la Tecnoloxía, moderada por Susana Luque, vicerrectora de Tresferencia y Relaciones cola Empresa. Nel coloquiu, participaron David González, director executivu de l'axencia Sekuens; Laura Gutiérrez, cofundadora y directora científica de PlaBiTe; Pablo García, cofundador de Enfasys; Robeca Alonso, cofundadora de Nanovex; y Alberto Díaz, alministrador de BeAble Capital.