La Universidá d'Uviéu amosó esti llunes na Feria Internacional d'Amueses d'Asturies les esperiencies y bondaes de PUMUO, el Programa Universitariu para Mayores de la institución académica. L'actu tuvo llugar na Sala Mirador de la FIDMA, apinada d'alumnáu y comenenciudos nesta ufierta académica. El rector de la Universidá d'Uviéu, Ignacio Villaverde, y la vicerrectora d'Estensión Universitaria y Proyección Cultural, María Pilar García Cuetos, presidieron la xornada acompañaos pol presidente de la Cámara de Comerciu de Xixón, Félix Baragaño.

Villaverde destacó que'l programa cumple yá 23 años y llogró asitiase nel territoriu, con aules n'Uviéu, Xixón, Mieres, Avilés y L.luarca. Amás, el rector sorrayó que fueron más de 5.000 les persones matriculaes na última década que nun agamben nel so enfotu de siguir ampliando conocencies. Pela so parte, García Cuetos fixo un paralelismu colos Xuegos Olímpicos para afalar al estudiantáu de PUMUO a nun cayese y caltener viva l'interés. 

Tantu Villaverde como García Cuetos estimaron el sofitu de la Fundación Caxa Rural y de los conceyos collaboradores, que tuvieron representaos nel actu al traviés de la presencia de dellos conceyales. 

Tres la intervención, tuvo llugar una mesa redonda moderada pola periodista asturiana Susana Machargo, na que participaron trés estudiantes de PUMUO: Soledad González Menéndez, Dolores Guerra Suárez y Juan Pablo García Melgar. Los trés rellataron qué significa esti programa para ellos y animaron a tolos presentes a matriculase para'l próximu cursu. Como broche d'oru al actu, tuvo llugar l'actuación del Coru Clarín de l'Asociación PUMUO-AUMA.