La Universidá d'Uviéu publicó güei la tercera llista d'almitíos de la fase A para graos con llende de places. Los estudiantes almitíos tendrán de formalizar agora la so matrícula del 30 de xunetu al 20 d'agostu. La institución académica asturiana recuerda que quien nun formalice la matrícula va dexar la plaza llibre y va correr la llista d'axudicaciones. Destaca, tamién, la obligación d'anovar la solicitú para la llista d'espera para aquellos estudiantes que nun llograren plaza en nenguna titulación o que nun se matricularon de la plaza asignada. Pela so parte, el periodu de reclamaciones va tar abiertu dende'l 30 de xunetu al 20 d'agostu. El próximu 22 d'agostu publicará la cuarta llista d'almitíos de la Fase A y la primer axudicación de places de les Fases B y C.

Les notes de corte d'esta tercer axudicación son provisionales, yá que a midida que queden places llibres dirán cubriéndose con estudiantes en llista d'espera. Nesta tercer axudicación de places, los estudios de grau con nota d'accesu más alta son: el doble grau n'Inxeniería Informática del Softwhare y Matemátiques (13,402), el doble grau n'Inxeniería Informática en Tecnoloxíes de la Información y Ciencia ya Inxeniería de Datos (13,336), el doble grau en Matemátiques y Física (13,033 Opción A y 13,384 Opción B), el grau en Medicina (12,906), el grau n'Odontoloxía (12,700), el grau en Biotecnoloxía (12,628), el grau en Matemátiques (12,552) y los graos n'Enfermería d'Uviéu (12,500) y Xixón (12,270).