La Universidá d'Uviéu fixo pública la segunda llista d'almitíos de la fase A en graos con llende de places. Los estudiantes almitíos tendrán de formalizar agora la so matrícula del 23 d'a'l 28 de xunetu. La Universidá d'Uviéu recuerda que quien nun formalice la matrícula va dexar la plaza llibre y va correr la llista d'axudicaciones. Destaca tamién la obligación d'anovar la solicitú para la llista d'espera para aquellos estudiantes que nun llograren plaza en nenguna titulación o que nun se matricularon de la plaza asignada. El periodu de reclamaciones tamién va tar abiertu dende'l 23 al 28 de xunetu. El 30 de xunetu publicará la tercera llista d'almitíos de la fase A y el 22 d'agostu, la cuarta axudicación de places de la fase A y la primer axudicación de places de les fases B y C.

Les notes de corte d'esta segunda axudicación son provisionales, yá que a midida que queden places llibres dirán cubriéndose con estudiantes en llista d'espera. Nesta segunda axudicación, los estudios de grau con nota d'accesu más alta son: El doble grau n'Informática de Software y Matemátiques (13,402), el doble grau n'Inxeniería Informática en Tecnoloxíes de la Información y Ciencia ya Inxeniería de Datos (13,336), el doble grau en Matemátiques y Física (13,156 opción A y 13,384 opción B), el grau en Medicina (12,964), el grau n'Odontoloxía (12,810), el grau en Biotecnoloxía (12,691), el grau n'Enfermería (12,6) y el grau en Matemátiques (12,552).