La ceremonia, que toma'l nome del que fuera rector de la institución académica, celebróse nel salón d'actos de la Escuela Politécnica de Mieres | El rector, Ignacio Villaverde, animó a los presentes a nun perder la vocación de serviciu públicu y a sentise parte de la institución: “La Universidá somos quien la formamos”
La Escuela Politécnica de Mieres acoyó esta mañana l'actu Rector Ales de toma de posesión de 161 miembros del Personal Docente ya Investigador (PDI) y del Personal Técnico, de Xestión y Alministración de Servicios (PTGAS) de la Universidá d'Uviéu. Esta ceremonia institucional, que toma'l so nome n'homenaxe al que fuera rector, simboliza'l compromisu públicu de quien xuren o prometen los sos cargos.
L'actu foi presidíu por Ignacio Villaverde, rector de la Universidá d'Uviéu, que tuvo acompañáu por Irene Díaz, vicerrectora d'Investigación; Pedro Alonso, vicerrector de Polítiques de Profesoráu y Ordenación Académica; José Antonio Díaz Llagu, xerente y Ángel Espiniella, secretariu xeneral. A la ceremonia tamién asistió'l que fuera rector, Santiago García Granda, según bona parte del equipu rectoral.
Nel últimu añu incorporáronse a la Universidá d'Uviéu o fueron reconocíes con un cargu académicu un total de 161 persones, de les que 97 correspuenden a PDI y 67 a PTGAS. En cuanto al personal docente ya investigador, cuatro fueron nomaos decanos, decanes, directores o directores d'escuela; 19 aportaron a una dirección de departamentu o institutu; 17 son caderalgos o caderalgues y 23 algamaron la categoría de profesores y profesores titulares.
De los 161 miembros de la comunidá universitaria que tomaron posesión de los sos cargos académicos o s'incorporaron como funcionarios a la Universidá d'Uviéu mientres l'últimu añu, participaron nel actu Rector Ales celebráu güei nel Campus de Mieres un total de 83 persones, que xuraron o prometieron énte'l rector cumplir coles obligaciones de los sos respectivos cargos.
Ignacio Villaverde recordó na so intervención que les tomes de posesión tienen un simbolismu especial y son “la espresión d'un compromisu de los qu'apuerten a un cargu o a un oficiu públicu”. El rector animó a los presentes a nun perder la vocación de serviciu públicu y sorrayó que “la universidá somos quien la formamos”. Nel so discursu, Villaverde aseguró que ser universitariu ye “xuna forma de vivir y entender la vida” y llamó a tolos presentes a contribuyir al bien común de la Universidá d'Uviéu.
