El rector de la Universidá d'Uviéu, Ignacio Villaverde, acompañáu de los vicerrectores de Polítiques de Profesoráu, Pedro Alonso, y d'Investigación, Irene Díaz, inauguró esta mañana xuntu al alcalde de Siero, Ángel García, y la concejala de Polítiques Sociales y Atención a les Persones, María José Fernández, el Centru d'Estudios sobro l'Impactu Social de la Intelixencia Artificial, el CEISIA, de la Universidá d'Uviéu en Llugones. L'oxetivu del proyectu, nel que collabora'l Conceyu de Siero, ye investigar, potenciar y fomentar l'usu de técniques d'Intelixencia Artificial nel ámbitu local, y analizar les ferramientes resultantes  coles mires d'ameyorar la calidá del serviciu que les alministraciones ufierten a la ciudadanía. Nel actu tuvieron presentes Roger Campione y Agustina Bouchet, director y secretaria del centru respectivamente, según dellos investigadores que van formar parte del equipu científicu del CEISIA. 

El conveniu, con una duración de cuatro años, cuenta con una aportación económica per parte del Conceyu de Siero, de 100.000 euros añales. Amás, el consistoriu vence a la Universidá d'Uviéu l'usu del Antiguu Edificiu de la Casa de la Cultura de Llugones p'allugar ellí'l CEISIA. Con ello, Siero Cunta yá, per primer vegada, con presencia de la Universidá d'Uviéu nel conceyu. 
Ente les funciones que tien el centru, que'l so equipu científicu va tar conformáu por investigadores de la Universidá d'Uviéu, va figurar l'analís, estudiu ya investigación de propuestes d'actuación basaes n'Intelixencia Artificial y la so aplicación nel ámbitu alministrativu, educativu, humanísticu y xurídicu-social; l'analís de les implicaciones que se deriven del usu de sistemes d'intelixencia artificial nel ámbitu alministrativu, educativu, humanísticu y xurídicu-social; l'aplicación y desenvolvimientu de técniques d'intelixencia artificial na enseñanza, nel tratamientu del llinguaxe alministrativu y la depuración o llimpieza de fontes de datos; el desenvolvimientu de técniques de predicción y meyora de procesos y la so posible aplicación al ámbitu de l'alministración local; l'espardimientu les temátiques rellacionaes col oxetu del conveniu según favorecer actividaes divulgatives sobro la tema; y la reflexón sobro les garantíes llegales y organizativas que tienen d'establecese nel usu d'estes nueves tecnoloxíes.

Mientres la puesta de llongura del centru'l rector de la Universidá d'Uviéu destacó que "el centru va cumplir el compromisu d'ayudar a les alministraciones locales, y en particular al Conceyu de Siero, a desenvolver procesos que van empobinaos a la busca de mecanismos que, al traviés de la Intelixencia Artificial, llogren que la vida de los nuesos ciudadanos sía meyor y entaínen les relaciones coles alministraciones". Pela so parte, Roger Campione, esplicó que "el CEISIA cuenta yá con más de 60 investigadores de la Universidá d'Uviéu, de tolos ámbitos y cañes de la conocencia" y añedió que "yá recibimos solicitúes de adscripción al CEISIA per parte d'investigadores d'otros llugares d'España". 

Tres actu institucional tivo llugar nel Centru Polivalente Integráu de Llugones xuna mesa redonda con dos espertos nesta área de la conocencia que van dialogar sobro les implicaciones científiques, étiques y llegales de la intelixencia artificial.  En concretu, fueron Humberto Bustince, catedráticu del Departamentu d'Automática y Computación de la Universidá Pública de Navarra (UPNA) y profesor honorariu de la Universidá de Nottingham xuntu a Ibán García del Blanco, llicenciáu en Derechu y especializáu en xestión cultural, diputáu del Parlamentu Européu mientres la novena llexislatura, de xunetu de 2019 a xunetu de 2024, quien, moderaos por Irene Díaz, vicerrectora d'Investigación de la Universidá d'Uviéu, quien analizaron el futuru de la intelixencia artificial, según les sos implicaciones científiques, étiques y llegales.