La Universidá d'Uviéu fixo pública la primer llista d'almitíos en graos con llende de places. L'estudiantáu almitíu tendrá de formalizar agora la so matrícula del 15 al 21 de xunetu. Quien nun formalice la matrícula va dexar la plaza llibre y va correr la llista d'axudicaciones. La institución académica recuerda la obligación d'anovar la solicitú para la llista d'espera para aquellos estudiantes que nun llograren plaza en nenguna titulación o que nun se matricularon de la plaza asignada. El periodu de reclamaciones tamién va tar abiertu dende güei llunes, 15 de xunetu, hasta'l próximu domingu, 21 de xunetu. El 23 de xunetu publicará la segunda llista d'almitíos y el 30 de xunetu, la tercer axudicación de places.

Les notes de corte d'esta primer axudicación son provisionales, yá que a midida que queden places llibres dirán cubriéndose con estudiantes en llista d'espera. Nesta primer fase, los estudios de grau con nota d'accesu más alta son el doble grau n'Inxeniería Informática del Software y Matemátiques (13,500); el doble grau n'Inxeniería Informática en Tecnoloxíes de la Información y Ciencia ya Inxeniería de Datos (13,400); el doble grau en Matemátiques y Física (13,384 Opción B y 13,245 Opción A); el grau en Medicina (13,198) y el grau n'Odontoloxía (13,064).

Amás, quepe destacar les notes de corte de la nueva ufierta académica de la Universidá d'Uviéu para'l próximu cursu. Nesti casu, el grau en Criminoloxía algama'l 12,02,  ente que'l doble grau en Criminoloxía y Derechu remata esta primer axudicación con un 11,9 y el grau de Ciencies de l'Actividá Física y el Deporte asitiar nel 11,536.

Matrícula en estudios de grado
Primera lista de adjudicación de plazas
Admisión de alumnos de nuevo ingreso