L'equipu masculín de la sección de baloncestu de la Universidá d'Uviéu volverá competir en Lliga EBA, renombrada como Tercer FEB. La sección masculina del equipu universitariu, que baxara la pasada temporada, llegó a un alcuerdu col Alimerka Uviéu Baloncestu para dar continuidá al proyectu y asumir la plaza d'ascensu llograda pol equipu filial del club uvieín dende la categoría nacional. Esta alianza va dexar a los meyores xugadores universitarios del Principáu d'Asturies siguir col so desenvolvimientu deportivu y académicu compitiendo n'una lliga d'algame nacional.

L'equipu uvieín va apurrir talentu reforzando la plantiya universitaria con dos xugadores sub-22 y va atraer patrocinios que sofiten l'afitamientu deportivu d'un proyectu al que la Universidá d'Uviéu quier dar llargu percorríu. Para ello, la collaboración ente dambes instituciones estiéndese tamién a la estructura del equipu femenín de l'A.D. Universidá d'Uviéu, que milita na 1ª categoría Nacional del baloncestu español y les categoríes inferiores del Alimerka OCB.

L'alcuerdu puede xenerar un efectu llamada una vegada empiece'l grau de Ciencies de l'Actividá Física y del Deporte na Universidá d'Uviéu, prevista pal próximu cursu académicu, y atraer talentu deportivo d'otres comunidaes escontra la universidá asturiana.