El Campamentu Xeográficu Itinerante (CGI) Sela percuerre'l macizu de Ubiña ente Asturies y Llión mientres cuatro xornaes. Nesta edición son 34 los participantes que percuerren a cuerpu y pernoctando sobro'l terrén la distancia entre Xomenzana, nel conceyu de L.lena, y Vil.lablinu. L'actividá, entamada pel Centru de Cooperación y Desenvolvimientu Territorial (CeCodet) de la Universidá d'Uviéu, cuenta cola collaboración del Reximientu Príncipe 3, con base nel acuartelamiento Cabu Noval.   

El CGI sigue la llínea de les históriques escursiones instructives puestes en marcha en 1883. Aniceto Sela Sampil, quien da nome a esti programa, foi unu de los sos principales impulsores. La presente edición ta dedicada a Manuel Bartolomé de Cossio, un destacáu miembru de la Institución Llibre d'Enseñanza. La so obra profesional y la so vida personal tuvieron rellacionaes mientres mediu sieglu cola Fundación Sierra Pambley, en que la so see remata'l percorríu d'esta excusión instructiva.

Los y les participantes nesta edición proceden tantu d'Asturies como de la vecina Llión y otros puntos del país. Amás, llegaron inscripciones dende México o Ucrania. La principal finalidá d'esta actividá pasa por ampliar la cultura territorial de los inscritos, según fomentar el trabayu n'equipu.

Quien participen siguen les instrucciones de los cuadros de mandu del Reximientu Príncipe 3, qu'intervienen na formación al traviés de la ordenación de les marches, entamando exercicios mientres elles o disponiendo les midíes de seguridá. Amás, el CGI cuenta con profesoráu voluntariu, qu'actúa con ponencies sobro'l terrén.  

Na presente edición va falar de l'amistá ente Manuel Bartolomé de Cossio y Aniceto Sela Sampil, quien compartíen l'interés pol macizu de Ubiña y les tierres que la arredolen. Xuna zona ganadera milenaria que percuerren ente esti martes, 2 de xunetu, y el próximu vienres, 5 de xunetu, en marches de siete hores de duración y dificultá moderada. 

La excusión instructiva empieza na parroquia de Xomezana, nel conceyu de L.lena. La espedición va xubir al so pisu más altu hasta visualizar los puertos de Güeria, pasando dende ende al valle de Meicín, na parroquia de Tuiza. Dempués, el CGI sigue hasta les vegues de Pinos y percuerre Riolago y Torre de Babia hasta llegar a Vil.lablinu, onde van ser recibíos el 5 de xunetu pola Fundación Sierra Pambley y el Conceyu. Nesti puntu final van poder conocer el papel que xugó esta centenaria institución nel desenvolvimientu de la contorna lleonesa de L.laciana. 

Con ello habráse arrodiáu'l macizu de Ubiña, reconocíu como xuno de los más importantes polos ganaderos de la Península. Les marches van siguir el planteamientu habitual de les escursiones xeográfiques, nes que cada participante camina col so equipu, acompañáu sobro'l terrén y con esplicaciones del paisaxe y exercicios d'orientación, team buiding y lideralgu.

El CGI Sela ye un proyectu del CeCodet de la Universidá d'Uviéu que na campaña de 2024 facer en cooperación cola Universidá de Llión, la Fundación Sierra Pambley, la Universidá de Málaga, el Tecnolóxicu de Monterrey, el CeCodet-Los Valles de la Universidá de Guadalaxara (México), la UFES (Brasil) y el Ministeriu de Defensa.