Les xornaes rexuntaron, mientres dos díes, a una trentena de destacaos miembros del profesoráu de les universidaes públiques del grupu y tuvieron diseñaes para intercambiar idees y estratexes innovadores | Per parte de la Universidá d'Uviéu, asistió Juan Manuel Marchante, vicerrector d'Estudios y Docencia.
El Bizkaia Aretoa de la Universidá del País Vascu / Euskal Herriko Unibertsitatea (UPV/EHU) en Bilbao tresformóse esta selmana nun referente d'innovación educativa cola celebración de les primeres Xornaes del Grupu 9 d'Universidaes (G-9) sobro esta temática.
Les Xornaes rexuntaron, mientres dos díes, a una trentena de destacaos miembros del profesoráu de les universidaes públiques del grupu y tuvieron diseñaes pa intercambiar idees y estratexes innovadores. Per parte de la Universidá d'Uviéu, asistió Juan Manuel Marchante, vicerrector d'Estudios y Docencia.
Inauguración y visiones compartíes
L'actu d'inauguración cuntó cola presencia del vicerrector del Campus de Bizkaia, Gorka Moreno, quien destacó la dualidá de la innovación docente “tantu como un oxetivu como un mediu p'alzar la calidá de la Educación Cimera y beneficiar a la sociedá". De la mesma, la vicerrectora de Grau ya Innovación Educativa, Laura Vozmediano, resaltó'l valor d'estes xornaes como "un pebidal de nueves idees y conocencies", ente que la vicerrectora de Posgrado y Formación Continua, Montse Maritxalar, enfatizó “la importancia del intercambiu de bones práctiques y la collaboración ente instituciones”.
Desenvolvimientu profesional y metodolóxicu
Les Xornaes centráronse en promover metodoloxíes actives d'aprendizaxe y evaluación, esenciales pal desenvolvimientu de competencies práctiques y relevantes pal estudiantáu. Amás, l'aprendizaxe-serviciu destacóse como xuna ferramienta clave pa integrar el serviciu comuñal col aprendizaxe académicu, preparando al estudiantáu non solo como profesionales, sinón tamién como ciudadanos comprometíos.
Futuru y continuidá de les Xornaes
Les Xornaes fueron diseñaes con una clara vocación de continuidá, planiándose la so realización de forma rotatoria ente les sedes de les universidaes pertenecientes al Grupu 9, según manifestó la rectora de la UPV/EHU, Eva Ferreira. “Esta iniciativa non solo fortalez los llazos ente les instituciones participantes, sinón que tamién asegura un intercambiu constante de conocencies y esperiencies que va arriquecer la ufierta educativa de cada una”, indicó Ferreira.
