La Cátedra MediaLab apurrió per segundu añu un galardón que pretende reconocer la implicación social del estudiantáu al traviés de la so participación activa na vida universitaria y de la so collaboración con entidaes del tercer sector. | Al premiu principal de 1.000 euros destinaos a l'asociación Mocedá Maliaya, escoyida pol ganador, sumáronse anguaño dos accésits de 500 euros cada unu que recibieron Borja Ruisánchez Mier y Elsa Villa Fernández y donaron a Equipo Europa y Asociación Galbán, respectivamente.
La Cátedra MediaLab de la Universidá d'Uviéu apurrió güei miércoles los segundos premios Impacto Positivu. Estos galardones pretender dar visibilidá al estudiantáu que destaca non solo pol so espediente académicu, sinón tamién pola so participación activa na vida universitaria y la so implicación social al traviés de la so collaboración con entidaes del tercer sector.
L'estudiante David Oteru Vallina foi reconocíu anguaño col galardón. Recibió de manos del vicerrector de Planificación Estratéxica y Coordinación de Campus, Juan Carlos San Pedro, un cheque de 1.000 euros y una escultura acreditativa realizada por estudiantes de la Escuela d'Arte d'Uviéu. Esti importe va dir destináu a l'asociación Mocedá Maliaya, una organización que promueve la participación cultural, social y comuñal ente los y les moces de Villaviciosa.
Nesta edición, la cátedra MediaLab incluyó dos accésits dotaos con 500 euros cada unu colos que se quixo reconocer la implicación social y académica d'otros dos estudiantes, Elsa Villa Fernández y Borja Ruisachez Mier, quien destinaron los sos cheques a les asociaciones Galbán y Equipo Europa, respectivamente.
Nel actu, celebráu nel Paraninfu del Edificiu Históricu de la Universidá d'Uviéu y presidíu pol vicerrector de Planificación Estratéxica y Coordinación de Campus, Juan Carlos San Pedro, participaron Ángela Pumariega, vicealcaldesa de Xixón; Eva Pando, directora de la Fundación Caxa Rural d'Asturies; Reyes Ceñal, representante de Compromiso Asturies XXI; Santiago Fernández, director xerente de la Fundación Universidá d'Uviéu y Alfonso Díaz, miembru de “Profes con Impactu” de la Cátedra MediaLab, organizadores del esti galardón.
Los estudiantes pudieron conocer, amás, a Raúl Entrerríos, unu de los meyores xugadores de la hestoria del balonmano español y Medaya d'Asturies 2022. El campeón mundial y medallista paroló con Reyes Ceñal, de Compromiso Asturies XXI, sobro la so trayectoria deportiva y los sos retos de futuru.
Tres la entrega de cheques, el premiáu, graduáu n'Enfermería pola Universidá d'Uviéu, clausuró l'actu con un discursu nel qu'animó a los sos compañeros y compañeres a arreyase: "Ayudar a los demás y participar viviegamente na vida universitaria moldiaron quien soi güei".
