Nel so alcuentru semestral, celebráu nesta ocasión na see de CRUE Universidaes Españoles, en Madrid, responsables de los Vicerrectorados d'Investigación, Innovación y Tresferencia de la Conocencia del Grupu 9 d'Universidaes (G-9) axuntáronse para encetar oportunidaes de meyora na xestión de les árees nes que trabayen. Estes sesiones de trabayu sirven para “l'intercambiu de bones práctiques y el fortalecimientu de la collaboración, según para esponer estratexes para optimizar los recursos y capacidaes d'investigación de les nueses universidaes públiques”, señaló Julián Garde, presidente de la comisión sectorial d'Investigación del G-9 y rector de la Universidá de Castiella-La Mancha. En representación de la Universidá d'Uviéu, allegó la so vicerrectora d'Investigación, Irene Díaz.

Evaluación de convocatories de planes propios d'Investigación

La capacidá de respuesta de les axencies evaluadoras frente al altu númberu de convocatories de planes propios d'Investigación de les universidaes a evaluar foi otru puntu aldericáu na xunta. Esquizáronse soluciones como la evaluación interna colaborativa ente universidaes, especialmente en comunidaes autónomes que comparten llingües cooficiales, pa solliviar la carga sobro l'axencia estatal y asegurar asina que sigan les evaluaciones imparcial y eficiente.

Promoviendo la Ciencia Abierta

Delles universidaes del G-9 espunxeron los sos progresos na transición escontra la Ciencia Abierta. Sorrayóse la importancia d'afaer los modelos universitarios a les práctiques globales d'Investigación Abierta p'aumentar, d'esta forma, la visibilidá y l'impactu académicu.
CoARA y meyora na evaluación de la investigación

Anque'l compromisu cola Coalición pa la Meyora de la Evaluación de la Investigación (CoARA, poles sos sigles n'inglés) varia según les universidaes del Grupu, hubo un alcuerdu xeneral sobro la necesidá de dir incorporando gradualmente los principios CoARA nos procesos d'evaluación internos. Les universidaes tán buscando adoptar indicadores que prioricen la calidá sobro la cantidá na producción científica, reflexando un cambéu escontra evaluaciones más cualitatives y significatives, coles dificultaes d'implantación qu'esto supon.

Innovaciones na xestión d'infraestructures y equipamientos

Nel intre de la xunta tamién s'encetó la tarificación interna de servicios y equipamientos científicu-técnicos. Aldericóse cómo los incentivos y descuentos podríen alliniar meyor los intereses de el investigadores colos de les universidaes, fomentando un usu más eficiente y estratéxicu de los recursos disponibles.

El presidente de la comisión destacó la productividá d'esti alcuentru, señalando que "los alderiques y les decisiones tomaes güei refuercen el nuesu compromisu común cola excelencia y la collaboración na investigación”. Coles mesmes, “la próxima xunta, programada pal mes d'ochobre en Pamplona, va siguir con estos esfuerzos, buscando soluciones y estratexes pa enfrentar los retos futuros de manera conxunta” concluyó Garde.