Casi 2000 estudiantes de Bachilleratu y Formación Profesional d'Asturies van asistir a les Xornaes de Puertes Abiertes de la Universidá d'Uviéu que se van desenvolver los díes 15, 16 y 17 d'esti mes en toles facultaes y escueles de la institución académica d'enseñanza cimera. Los alumnos, pertenecientes a 64 centros educativos d'Asturies, van tener ocasión de conocer tantu les titulaciones qu'imparte la Universidá d'Uviéu como les sos instalaciones.

Alfonso López Muñiz, vicerrector d'Estudiantes en funciones, sorraya qu'estes xornaes son una “escelente oportunidá” por que los futuros universitarios tomen contactu cola institución académica. López Muñiz destaca que los estudiantes preuniversitarios van recibir información y asesoramientu específicu de los distintos centros, en función de los sos intereses, pocos díes antes de realizar la EBAU y escoyer la titulación que van cursar nos próximos años. 

Al igual qu'en pasaes ediciones, les 17 facultaes y escueles participantes, en coordinación col Vicerrectorado d'Estudiantes, prepararon un programa que consiste nuna charra informativa sobro cuestiones xenerales y titulaciones de cada centru universitariu, que va tar impartida polos sos responsables, y que se va complementar, de siguío, con una visita empuesta poles instalaciones. Los díes 15 y 16 planiáronse visites tanto n'horariu de mañana como de tarde y el 17 solo pela mañana.

El vicerrector d'Estudiantes concretó que, pel momento, tán inscritos 64 centros educativos del Principáu d'Asturies, con un total 1.875 estudiantes de Bachilleratu y de ciclos formativos de grau cimeru de Formación Profesional. El desglose per díes ye'l siguientes: 

• 15 de mayu: 1074 estudiantes.
• 16 de mayu: 553 estudiantes.
• 17 de mayu: 248 estudiantes.
• Total: 1875.

El vicerrector d'Estudiantes animó a tol alumnáu que participa nes xornaes a sacar el máximu provechu de la visita a los centros pa escoyer correchamente los estudios que van marcar la so vida mientres los próximos años.