La Universidá d'Uviéu y Enagás roblaron güei un conveniu de collaboración empresarial que pon en marcha la Cátedra de Desenvolvimientu de Vectores Enerxéticos Sostenibles. L'alcuerdu establez un marcu conxuntu de collaboración que va dexar realizar un estudiu técnicu-económicu para afaer la terminal de gas natural licuado de Musel Y-Hub, en Xixón, como llanta multimolécula (y-terminal), lo que va dexar almacenar y xestionar molécules climáticamente neutres como l'hidróxenu verde y los sos derivaos.

La cátedra va desenvolver un estudiu de viabilidá de los nuevos vectores enerxéticos sostenibles, nel contestu de la transición enerxética, según la selección de les meyores alternatives futures para la Planta de Musel Y-Hub —participada al 75% por Enagás y al 25% por Reganosa—, como l'hidróxenu anovable o'l tresporte y almacenamientu de CO2, ente otres.

Al actu de firma, celebráu güei nel Edificiu Históricu de la institución académica, asistieron Ignacio Villaverde, rector de la Universidá d'Uviéu; Claudio Rodríguez, director xeneral d'Infraestructures de Enagás, Javier Perera, director xeneral de Persones y Tresformamientu de Enagás, ya Ignacio Muñumer, director d'Organización y Talentu de Enagás.

La cátedra, que va tener un periodu de vixencia de cuatro años, ye la primer collaboración al llargu plazu na que les dos entidaes van promover proyectos d'I+D y actividaes empobinaes a la promoción social de la investigación y el desenvolvimientu tecnolóxicu nesti ámbitu. Esta nueva cátedra forma parte de les iniciatives contemplaes en marcu de la Universidá Corporativa de Enagás, que favorecen el desenvolvimientu de la conocencia nel ámbitu de la sostenibilidá y la descarbonización. 

La compañía Enagás apunta qu'un 78% de los profesionales que trabayen na Planta de Musel Y-Hub son d'Asturies y formen parte d'un equipu humanu d'alredor de 50 persones. Adicionalmente, la planta xenera en redol a 100 empleos indirectos. En xunetu de 2023, la planta de gas natural licuado (GNL) de Musel Y-Hub recibió l'acta de puesta en serviciu definitiva y, n'agostu, atracó na terminal el primer barcu comercial.