La directora de DuPont para España y Portugal centró la so intervención nos retos que tendrá d'asumir la universidá nel futuru ya incidió na necesidá de dar un pasu más para pasar del papel de control que tien el Conseyu Social a un rol más estratéxicu | Villaverde refirióse al importante papel que tien de desempeñar el Conseyu Social, al que definió como “una pieza indispensable” de la nuesa universidá, “esa ponte ente l'academia y la sociedá a la que sirvimos”
Ángela Santianes de Molenes, directora de DuPont para España y Portugal, tomó güei posesión del so cargu como presidenta del Conseyu Social de la Universidá d'Uviéu. Santianes de Molenes asumió'l so nuevu cometíu nun actu institucional, desenvueltu nel Paraninfu del Edificiu Históricu, que cuntó cola presencia d'Ignacio Villaverde, rector de la Universidá d'Uviéu, arropáu pol so equipu de gobiernu, y el presidente del Executivu asturianu, Adrián Barbón, ente otres autoridaes.
Santianes de Molenes centró la so intervención nos retos que tendrá d'asumir la universidá nel futuru ya incidió na necesidá de dar un pasu más pa pasar del papel de control que tien el Conseyu Social a un rol más estratéxicu. La nueva presidenta, segunda muyer que va tar al frente del conseyu, abogó amás por establecer una canal de comunicación ente empresa y universidá para engrasar les pontes ente dambos estamentos.
Ignacio Villaverde, rector de la Universidá d'Uviéu, glosó la figura de Santianes de Molenes, a quien estimó asumir el retu de “traer a la nuesa centenaria institución universitaria la so voluntá de crecer y faelo cola puxanza y la determinación coles que siempres encaró los desafíos”. Precisamente falando de retos, el rector detúvose na aprobación de los Estatutos, sofitaos ayeri casi unánimemente pol Claustru, y citó tamién aspeutos como l'Alianza INGENIUM o'l futuru Campus d'El Cristu, los presupuestos de 2025 o l'adaptación de les plantiyes de profesoráu a les esixencies de la LOSU. Villaverde recordó que toes estes circunstancies obliguen a adelantrar les elecciones al rectoráu. “Nun adelantrales solo provocaría serios perxuicios a la comunidá universitaria, y el más elemental sentíu de la responsabilidá institucional non solo aconseya, impon, el deber d'empecipiar esta nueva etapa con un mandatu anováu pa siguir cola xera qu'entamemos nel añu 2021”.
Villaverde refirióse, a lo último, al importante papel que tien de desempeñar el Conseyu Social, al que definió como “xuna pieza indispensable” de la nuesa universidá. “Ye esa ponte ente l'academia y la sociedá a la que sirvimos. Espero de corazón que nun piensen qu'el so únicu llabor ye la de fiscalizar la nuesa actividá económica. Precisámoslos por qu'ayúdennos viviegamente a estrechar los llazos ente universidá y la so redolada, a convencer de qu'invertir n'universidá ye xuna apuesta segura, a ser más fuertes porque lo somos na nuesa redolada y que esti siéntase arreyáu nel aportar de la so universidá”, concluyó.
