La presidenta de CRUE y rectora de la Universitat Jaume I, Eva Alcón, participó esti llunes, 4 de marzu, na inauguración del Cume de Rectores y Rector México España, entamada xuntu cola Asociación Nacional d'Universidaes ya Instituciones d'Educación Cimera de México (ANUIES) y l'Universidá Nacional Autónoma de México (UNAM), sol lema «Educación cimera, inclusión y diversidá». En representación de la Universidá d'Uviéu, asistió Daniel Santos, vicerrector de Internacionalización.

Mientres la so intervención, Alcón afirmó qu'esti alcuentru ye una oportunidá para intercambiar esperiencies y bones práctiques ya impulsar polítiques educatives innovadores, nun momentu nel que la Universidá «tien d'apurrir respuestes a les necesidaes que nos tresllada la sociedá». «Solo asina vamos poder esplegar tou'l nuesu potencial, basáu na conocencia y la tresmisión de valores, como motor de tresformamientu social», añedió.

La presidenta de CRUE, acompañada por rectores y rectores y representantes d'un total de 26 universidaes españoles, destacó qu'esti cume sirve tamién para unviar el mensaxe a la sociedá de que les universidaes asumen «el retu d'exercer el lideralgu para construyir un futuru meyor» y sorrayó que «solo al traviés de la docencia, la investigación y l'innovación que se realiza na Universidá puede respondese a los desafíos sociales, económicos y ambientales, que son cambiantes, esixentes y globales».

Alcón compartió mesa inaugural col rector de la Universidá Autónoma de México UNAM, Leonardo Lomelí; el subsecretariu d'Educación Cimera, Luciano Concheiro; el secretariu xeneral executivu de la ANUIES, Luis Armando González; la directora executiva de l'Axencia Mexicana de Cooperación Internacional para'l Desenvolvimientu, Gloria Sandoval; la presidenta del Colexu de México, Silvia Giorguli; l'embaxador d'España en México, Juan Duarte; la secretaria de Desenvolvimientu Institucional de la UNAM, Tamara Martínez Ruiz, y el coordinador de Relaciones y Asuntos Internacionales de la UNAM, William Llee Alardín.

Nuevos esquemes de cooperación

Pela so parte, el secretariu xeneral executivu de la ANUIES, Luis Armando González, incidió na importancia de promover la «internacionalización solidaria» de la educación cimera, que va «más allá d'intercambios académicos qu'apurran soluciones tanxibles a les apremiantes necesidaes de la sociedá». Coles mesmes, afirmó qu'esto obliga a les universidaes a diseñar nuevos esquemes de cooperación y la collaboración universitaria ente México y España, que se reflexa nun «brengosu» intercambiu d'estudiantes, profesores ya investigadores y en más d'un millar d'alcuerdos de cooperación ente instituciones d'educación cimera, según ente estes entidaes y organismos gubernamentales de dambos países.

El rector de la universidá anfitriona, Leonardo Lomelí, espresó que les instituciones d'Educación Cimera enfréntense desafíos que-yos demanda collaborar de manera más estrecha y plural énte diversos retos», y punxo como exemplu que, anque'l 30 per cientu de la población de 19 a 23 años n'Iberoamérica y n'América Llatina, estudia en dalguna universidá, les tases d'accesu varien enforma ente países, según datos de la Organización d'Estaos Iberoamericanos. Tamién alvirtió de que, magar que les muyeres predominen na matrícula, persiste un sesgu en campos rellacionaos cola ciencia, tecnoloxía, inxeniería y matemátiques.

Énte esti escenariu, el rector de la UNAM señaló que ye «indispensable» intensificar los programes d'intercambiu ya investigación, amás de «esquizar nueves árees de cooperación» con gobiernos y empreses que contribuyan a atender les necesidaes emerxentes de les sociedaes.

Más de 7.000 estudiantes mexicanos n'universidaes españoles el cursu 2021-2022

L'embaxador d'España en México, Juan Duarte Cuadráu, sorrayó que México, xuntu col restu d'América Llatina, convirtióse n'unu de les exes de l'axenda educativa nel esterior del Gobiernu español y nel ámbitu de la internacionalización. Acordies con les estadístiques del sistema universitariu español, apuntó que nel ciclu 2021-2022, un total de 75.754 alumnos de Llatinoamérica estudiaron n'España, de los que más de siete mil yeren mexicanos.

Coles mesmes, indicó que, n'ese mesmu periodu, namá 839 estudiantes españoles allegaron a México a realizar estudios. Pal embaxador español, esti Cume puede ser un espaciu un espaciu d'intercambiu d'idees y proyectos que dexen «fortalecer la granible relación ente les dos naciones, oldear idees qu'impulsen la meyora de la conocencia, de la investigación y a formar a los líderes que demanden les nueses sociedaes con fonda inestabilidá».

Esti eventu cunta cola collaboración del Colexu de México, Santander Universidad México, l'Atenéu Español de México y l'Embaxada d'España en México, y axunta a más d'un centenar d'autoridaes d'instituciones d'educación cimera de dambos países. Ente esti llunes 4 y martes 5 de marzu celebrarán delles sesiones de trabayu sobro diverses temes: instituciones d'educación cimera como espacios d'alcuentru d'España y México, ayeri, güei y mañana; educación a lo llargo de la vida y les nueves formes d'aprendizaxe; intelixencia artificial, ética y responsabilidá social de la educación cimera; movilidá académica y cooperación cultural ente México y España; y ciencia abierta y xestión social de la conocencia.