El proyectu de SOMA-FITAG-UXT de reconvertir el Pozu San José nun centru de recuperación de maquinaria minera avanza a bon pasu. Güei, visitaron les instalaciones una delegación del SOMA-FITAG-UXT y Ángel Martín, director de la Escuela Politécnica de Mieres (EPM), al pie de el directores de Minería y de Comunicación d'HUNOSA. 

El director de la EPM manifestó'l sofitu del centru a esti proyectu, nel marcu del compromisu que la Universidá d'Uviéu siempres amosó al desenvolvimientu formativu ya investigador nes contornes mineres. 

Na visita de güei al Pozu San José, Ángel Martín espresó'l so interés na puesta en marcha del centru de recuperación de maquinaria minera en dichu pozu y tamién apuntó que sería interesante cuntar col sofitu del grupu d'arqueoloxía industrial de l'Asociación Cultural y Minero Santa Bárbara, de Mieres.

La Universidá d'Uviéu amosó yá en delles ocasiones el so sofitu a la puesta en valor de los distintos elementos que conformen el legáu de la Cultura Minera, y ufiertó la so collaboración para la promoción de la so declaración como Bien d'Interés Cultural (BIC).  

Amás, la Universidá yá trabaya xuntu al SOMA-FITAG-UXT, HUNOSA y el Gobiernu del Principáu d'Asturies na puesta en marcha d'una Cátedra nesti ámbitu, una amuesa más, del interés del actual rector de la Universidá d'Uviéu, Ignacio Villaverde, en potenciar el Campus de Mieres.

Pela so parte, el Secretariu Xeneral del SOMA-FITAG-UXT, estima'l sofitu de la Escuela Politécnica de Mieres, considerando la so implicación como l'emburrie necesariu por que toes les partes implicaes arreyar de manera definitiva na puesta en marcha de la propuesta,  qu'ensin llugar a dulda, como venimos diciendo, ye una iniciativa que tamién contribúi a la xeneración d'empléu alternativu a la minería, según a la rentabilización de parte del patrimoniu industrial d'HUNOSA.