La Comisión Sectorial de Xerencies del Grupu 9 d'Universidaes (G-9), presidida por Ignacio Villaverde, rector de la Universidá d'Uviéu, sollertó del sensible amenorgamientu d'autonomía universitaria y les consecuencies económiques derivaes de la recién implementación de la Llei Orgánica del Sistema Universitariu (LOSU). Axuntóse los díes 18 y 19 de xineru na see del Rectoráu de Cáceres de la Universidá d'Estremadura.

Nun analís inicial, el G-9 aportunó nos impactos negativos de la LOSU na capacidá de xestión alministrativa y financiera de les instituciones públiques que formen parte del Grupu. Esta situación esmolez considerablemente a les universidaes miembros, cuidao que la llei trai una medría significativa nos costos, especialmente no que respecta al gastu de personal. Nel conxuntu del G-9, la medría de costos, consolidable y creciente, añu tres d'añu, tan solo nos relativu a los cambeos de dedicación previstos na LOSU, supera los 135 millones d'euros según la monografía de 2023 de Financiamientu Públicu na Llei Orgánica del Sistema Universitariu de CRUE Universidaes Españoles. Les nueves disposiciones llegales obliguen a les universidaes a afaer les dedicaciones y encarar regulaciones ensin cuntar col respaldu económicu suficiente, poniendo en riesgu la sostenibilidá futura de les polítiques y la xestión independiente de cada universidá. 

“Dende'l borrador de la LOSU punximos de manifiestu que la entrada a valir de la norma diba suponer un impactu económicu importante y bien sustancial sobro la economía de les universidaes públiques españoles. Agora que ta aprobada y qu'empezamos yá a tener que faer aplicación de la llei orgánica, eso que s'había dichu va un añu manifestar en cifres concretes”, manifiesta Ignacio Villaverde. 

La comisión alcordó ellaborar un documentu de trabayu que contenga l'analís d'estos impactos económicos y la so proyección a futuru al envís de treslladalo a los sos respectivos gobiernos autónomos pa reforzar la so postura negociadora nel senu del Conseyu de Coordinación de Polítiques Universitaries, relativa al financiamientu de les universidaes, prevista nel artículu 55 LOSU ysobremanera, lo tocante al cálculu del 1% del PIB autonómicu que tien de destinase al financiamientu del serviciu públicu d'educación cimera universitaria. “Siguimos nun escenariu d'incertidume. Nenguna universidá sabemos cómo van contribuyir, tantu los gobiernos autonómicos como'l Ministeriu de Ciencia, Innovación y Universidaes, pa poder faer frente a esos costos que, si nun van poner en riesgu'l cumplimientu de la llei, sía que non, sí la salú económica de les nueses universidaes”, sorraya Villaverde. Recuerda'l rector de la Universidá d'Uviéu que les comunidaes autónomes que formen parte del G-9 tienen cuantíes distintes y “la relación col financiamientu real de les sos universidaes con respectu al 1% tamién varia enforma, pero nenguna llegamos a esi 1%”.

Les universidaes del G-9 encamienten a una revisión y diálogu abiertu con el llexisladores pa garantizar la viabilidá económica de les instituciones y caltener la calidá educativa y d'investigación que caracteriza al sistema universitariu español.

Plan de Formación PTGAS

Mientres la xunta, avanzóse que'l XI Plan de Formación 2024 pal PTGAS (Personal técnico, de xestión y d'alministración y servicios) del Grupu 9 d'Universidaes va ufiertar 61 cursos online, 14 más que na edición del pasáu añu. Supon una medría de 1.005 places hasta algamar les 3.355 places (en 2023 fueron 2.350). 23 cursos en 2024 enceten temátiques dafechu novedoses.

El procesu d'inscripción abrirá'l próximu 2 de febreru, hasta'l día 22 del mesmu mes. Primeramente, va publicase la información na páxina web del G-9 ww.uni-g9.net

Nel XI Plan de Formación PTGAS participen 11 universidaes. Al pie de les tradicionales del G-9, inclúyense como universidaes collaboradores a Murcia y Burgos.

Otros asuntos

La Comisión de Xerencies del G-9 alcordó alzar una propuesta de cambéu de la normativa en materia de compatibilidaes del empléu públicu pa facilitar l'accesu a la figura del profesor sustitutu del artículu 80.1 de la LOSU.