La Universidá d'Uviéu va coordinar el proyectu Culturality Cultural heritage in RURAL remote areas for creative tourism and sustainabilITY, un consorciu formáu por 13 instituciones europees que tien ente los sos oxetivos la dinamización cultural, l'activación económica y el desenvolvimientu sostenible de les zones rurales remotes al traviés de la promoción d'actividaes turístiques culturales y creatives, favoreciendo la creación d'empléu y l'asentamientu de la población. La investigadora principal del proyectu, que va empezar el 1 d'abril d'anguaño y va estendese hasta'l 31 de marzu de 2028, ye la profesora Ana María Fernández García, del Departamentu d'Hestoria del Arte y Musicoloxía de la Universidá d'Uviéu.

El consorciu de Culturality, que va cuntar con un presupuestu de 3 millones  d'euros, ta formáu pola Universidá d'Uviéu, como institución coordinadora, Espaciu Tormaleo, Ecomuséu La Ponte y UriaXait S.L. (España), el Politécnicu de Turín (Italia), la Universidá de Aveiro (Portugal), la Universidá de St Andrews y Applied Arts Scotland (Escocia), la Universidá de Tartu (Estonia), el Centru d'Investigación de l'Academia Eslovena n'Artes y Ciencies (Eslovenia), Museum Nord (Noruega), Region Värmland (Suecia) y el Distritu de Maramures (Rumanía). Tal que esplica Ana Fernández, “cada unu d'ellos apurre esperiencia nuna área distinta a los demás, dando llugar a un equipu multidisciplinar d'especialistes en patrimoniu, economía de la cultura, antropoloxía, diseñu industrial y artesanía, ferramientes de la información y la comunicación, turismu y filosofía, amás de delles organizaciones que trabayen nel mediu rural, directamente coles comunidaes locales”. 

El proyectu Culturality pretende contribuyir a la dinamización cultural de zones rurales remotes, según promover la so activación económica y el so desenvolvimientu sostenible. La profesora Fernández esplica que “esta dinamización va realizase al traviés d'actividaes turístiques culturales y creatives en diches zones”. Pa escoyer estes actividaes, l'equipu va considerar les distintes capacidaes, potencial y especificidaes (materiales, creatives, humanes… de cada zona y va investigar el potencial del so patrimoniu cultural, concretamente la cultura material artesanal (técniques, materiales, patrones y elementos decorativos), y la cultura intanxible (conocencia oral, música y tradiciones culinaries). 

Al traviés d'una metodoloxía d'investigación básica, aplicada y esperimental, van desenvolvese distintes esperiencies de imbricación ente los saberes y práctiques tradicionales cola creatividá moderna. La parte esperimental va traducir na creación de LivingLabs como espacios d'esperimentación de les conexones ente la creatividá popular y les propuestes artístiques actuales, como vertebradoras d'una nueva propuesta de turismu cultural identificativo del territoriu, capaz d'apigurar sinergias y de crear un empléu dignu.

El rector de la Universidá d'Uviéu, Ignacio Villaverde, reconoció la importancia de trabayar na meyora de les zones rurales y señaló que “les universidaes tenemos que dar respuestes a los problemes a los que s'enfrenten les sociedaes que nos acueyen”. “Nun hai dulda –añedió—de que'l despoblamientu rural ye unu d'estos problemes”. “Analizar los pasos a dar pa dinamizar zones remotes ye un exemplu claru de lo que la universidá puede apurrir a la sociedá, con acciones tanxibles y cuantificables, que pueden suponer un cambéu pa los ciudadanos”, concluyó. 

CULTURALITY, que yá cunta con una páxina web (https://esartuniovi.com/culturality)  na que s'ufierta tola información sobro'l proyectu, va distribuyir n'ocho paquetes de trabayu, cada unu d'ellos lideráu por un miembru distintu del equipu, anque tolos socios van collaborar na totalidá de les acciones. La Universidá d'Uviéu va ser la única institución que se va encargar de dos paquetes de trabayu, el de coordinación y xestión del proyectu y el llamáu “Escontra'l desenvolvimientu de nuevos modelos de negociu en zones rurales y remotes”. 
 
El financiamientu total del proyectu ye de 3 millones d'euros, que se van partir ente tolos miembros en función de diversos parámetros. Culturality tien la peculiaridá de cuntar con dos miembros asociaos estracomunitarios. Ye por ello que l'aportación de la Unión Europea va xubir a 2.444.223,75€, ente que los miembros asociaos (los escoceses Applied Arts Scotland y l'Universidá de St Andrews) van cuntar col sofitu económicu del so propiu gobiernu. 
Referencia
CULTURALITY “CULTUral heritage in RurAL remote areas for creative tourism and sustainabilITY”
IP: Ana María Fernández García (Departamento de Historia del Arte y Musicología de la Universidad de Oviedo)
Programa Horizonte Europa 2030 - Research and innovation on cultural heritage and CCIs – 2023 (HORIZON-CL2-2023-HERITAGE-01) - “Fostering socio-economic development and job creation in rural and remote areas through cultural tourism”.