Una aplicación online qu'apurre un mapa detalláu con horarios actualizaos y ocupación en tiempu real de los centros d'estudiu, un dispositivu esternu que protexe les víes venoses y torga que puedan ser retiraes polos pacientes y l'equipu d'estudiantes Wolfast Uniovi que lleva a cabu un proyectu de moto eléctrica alzáronse, respectivamente, colos primeros puestos de los Premios TalentUO-Santander nes sos trés modalidaes d'Idees, Tresferencia y Práctica Empresarial, qu'impulsa la universidá asturiana. 

Los galardones fueron apurríos esta tarde nel Paraninfu del Edificiu Históricu de la Universidá d'Uviéu nun actu que cuntó cola presencia de Begoña Cueto, vicerrectora de Tresferencia y Relaciones cola Empresa, Ana Suárez, directora d'área d'Empleabilidá y Emprendimiento, y Francisco Artime Alonso, director comercial Cantabria-Asturies de Banco Santander. 

Estos galardones, frutu de la collaboración de la Universidá d'Uviéu y Banco Santander al traviés de Santander Universidaes, tienen por oxetu ameyorar la capacidá d'entamar y anovar en tolos niveles de la comunidá universitaria. A esta segunda edición de los premios, presentáronse 18 propuestes. Los equipos responsables de les trés iniciatives ganadores van recibir xuna dotación económica de 3.000 euros, según un diploma acreditativu. 

La Vicerrectora de Tresferencia y Relaciones cola Empresa destacó la escelente calidá de les idees presentaes y estimó a tolos equipos la so participación. Begoña Cueto sorrayó que les iniciatives premiaes son un escelente exemplu de la capacidá entamadora de la institución universitaria y animó a los equipos a siguir avanzando nos sos proyectos.
 
INFORMACIÓN SOBRE LOS PROYECTOS PREMIAOS 

MODALIDÁ 1. PREMIOS Y MENCIONES ESCURRES TALENTUO SANTANDER  

1º Premiu Escurre TalentUO-Santander, con una dotación económica de 3.000 euros y el correspondiente diploma acreditativu, a la idea: Studyflow

Studyflow ye xuna aplicación online qu'apurre un mapa detalláu con horarios actualizaos y ocupación en tiempu real de los centros d'estudiu, según recursos para l'estudiu en casa (biblioteca virtual, sales d'estudiu online compartíes, incentivos a la concentración).

Componentes del equipu: Jesús Ait Idir Lahuerta; Pelayo Herrero Antolín y Susana Valvidares Fernández.

2º Premiu Escurre TalentUO-Santander, con una dotación económica de 2.000 euros y el correspondiente diploma acreditativu, a la idea: FlipYourLearning

Comunidá online que combina arte y ciencia para la divulgación de la conocencia científica ente estudiantes, familia y la sociedá polo xeneral. Inclúi funciones como clases particulares, talleres de ciencia y vídeos divulgativos.

Componentes del equipu: Leonel Virosta Gutiérrez y Claudia García Gómez.

3º Premiu Escurre TalentUO-Santander, con una dotación económica de 1.000 euros y el correspondiente diploma acreditativu, a la idea: Octopus-Kids

Esti proyectu plantega humanizar los cuidos d'enfermería en pruebes invasivas nel ámbitu pediátricu, como la estracción de sangre o la canalización d'una vía, por aciu 3 llínees paraleles: vídeu na sala d'espera, videoxuegu en realidá aumentada que favorez la distracción vía inmersión, y dispositivu qu'inmoviliza los brazos, pero dexa l'atención médica.

Componentes del equipu: Ariadna Vilasó Escarp y Verónica Camblor Pérez.

Mención meyor idea d'innovación social, con una dotación económica de 500 euros y el correspondiente diploma acreditativu, a la idea Esquiza

Axencia de viaxes online que busca conectar les ayalgues ocultes del mundu rural col turista estranxeru. Por aciu guíes universitarios, entama itinerarios de viaxe poles paraxes naturales y localidaes de la España balerada a lo llargo de too l'añu. Los itinerarios cunten con distintes categoríes en función de la duración y calidá del agospéu.

Componentes del equipu: Guillermo Esteban García y Álvaro Entrialgo Castro.

Mención meyor idea de negociu presentada por muyeres, con una dotación económica de 500 euros y el correspondiente diploma acreditativu, a la idea Octopus-Kids 

Esti proyectu plantega humanizar los cuidos d'enfermería en pruebes invasivas nel ámbitu pediátricu, como la estracción de sangre o la canalización d'una vía, por aciu 3 llínees paraleles: vídeu na sala d'espera, videoxuegu en realidá aumentada que favorez la distracción vía inmersión, y dispositivu qu'inmoviliza los brazos, pero dexa l'atención médica.

Componentes del equipu: Ariadna Vilasó Escarp y Verónica Camblor Pérez.

Mención meyor idea de negociu sostenible, con una dotación económica de 500 euros y el correspondiente diploma acreditativu, a la idea Verev-Vertical Energy Vault 

Proyectu innovador dedicáu al almacenamientu y producción d'enerxía anovable de forma sostenible que dexa convertir la enerxía potencial gravitatoria n'enerxía eléctrica.

Componentes del equipu: Adrián Iglesias Pérez; Álvaro Alonso de Llambo; Daniel Alberto Alonso Fernández y Alberto Muñiz García.

Mención meyor idea de negociu dixital, con una dotación económica de 500 euros y el correspondiente diploma acreditativu, a la idea Simplipay

Aplicación online que dexa compartir gastos. Ta especialmente diseñada pal públicu universitariu que se ve de cutiu na necesidá de pagar servicios compartíos, como viaxes, nos que xuno de los usuarios hai d'adelantrar el dineru. Con esta aplicación sería posible fraccionar el pagu nel momentu de la compra.

Componentes del equipu: Pablo Sánchez Villafáñez y Daniel Enrique Gávez Neri.
 
MODALIDÁ 2. PREMIO TRANSFERENCIA TALENTUO SANTANDER

1º Premio Tresferencia TalentUO-Santander, con una dotación económica de 3.000 euros y el correspondiente diploma acreditativu, a la idea: dispositivu protector de la vía venosa (PROVIAVEN)
 
Los pacientes d'edá avanzada tienen un amenorgáu nivel de tolerancia a les víes venoses necesaries pa recibir medicación y sueru. Pa evitar que puedan quitar, y los consiguientes entueyos, Proviaven (Protector de la Vía Venosa) ye un dispositivu esternu que protexe les víes y torga que puedan ser retiraes polos pacientes, facilita los cuidos y sollivia la congoxa de les persones hospitalizaes.

Componentes del equipu: Ana Fernández Feito; María del Rocío Fernández Rodríguez; Jose Manuel Sierra Velasco y José Luis Cortizo Rodríguez.

2º Premio Tresferencia TalentUO-Santander, con una dotación económica de 2.000 euros y el correspondiente diploma acreditativu, a la idea: Cubolab
 
Ye un dispositivu pensáu p'ameyorar la comunicación médicu paciente. El dispositivu tien forma de cubu que les sos cares recueyen un emoticonu que reflexa'l grau de dolor o prestar que siente un paciente nun momentu dáu. L'interior del cubu dispon d'un microprocesador que dexa que los estaos d'ánimu de los pacientes, manifestaos moviendo'l cubu, puedan ser conocíos polos profesionales sanitarios.

Componentes del equipu: María González García; Andrés Meana Fernández; Inés Fombella Coto y Luis Alfonso Díaz Secades.

3º Premio Tresferencia TalentUO-Santander, con una dotación económica de 1.000 euros y el correspondiente diploma acreditativu, a la idea: Hórreolinera d'enerxía sostenible Eres 

El proyectu propón l'usu d'horros asturianos como infraestructures multifuncionales que sirven d'estación de carga pa vehículos eléctricos y almacén d'enerxía, reinventando l'horru tradicional. L'horru incorpora un sistema híbridu d'enerxía anovable que xenera enerxía verde de forma sostenible.

Componentes del equipu: Aitor Fernández Jiménez; Manuel Ricu Secades; Antonio Javier Calleja Rodríguez y Eduardo Álvarez Álvarez.

MODALIDÁ 3. PREMIO PRÁCTICA EMPRESARIAL TALENTUO SANTANDER

Premio Práctica Empresarial TalentUO-Santander, con una dotación económica de 3.000 euros y el correspondiente diploma acreditativu al equipu de motociclismu Wolfast Uniovi

Equipu d'estudiantes que lleven a cabu un proyectu de moto eléctrica nel qu'ameyoren les sos habilidaes técniques y les sos soft-skill nel ámbitu de Motostudent, xuna competición mundial venceyada al mundu del deporte. L'equipu Wolfast Uniovi lleva 15 años compitiendo a nivel mundial algamando añu tres d'añu posiciones destacaes.

Representante equipu: Ana Mar Álvarez Díez.