L'Aula Magna del Edificiu Históricu de la Universidá d'Uviéu acoyó esta mañana l'actu inaugural de la xornada de concienciación Alimentando La Diversidá, entamada por Corteva Agriscience, compañía global 100% agrícola con see en Valle de Tamón, con motivu del Día Mundial de les Persones con Discapacidá (próximu 3 d'avientu), y en collaboración cola Oficina d'Atención a Persones con Necesidaes Específiques (ONEO) de la Universidá d'Uviéu y Enserta Empléu, entidá de Fundación ONCE, cofinanciada pola Unión Europea, especializada na formación y l'intermediación llaboral. 

Esta xornada busca crear conciencia sobro la inclusión social de les persones con discapacidá, empoderando les sos competencies individuales y sofitando la so empleabilidá. La inauguración cuntó cola participación d'Alfonso López Muñiz, vicerrector d'Estudiantes de la Universidá d'Uviéu; Cristina González Morán, directora xeneral d'Universidá de la Conseyería de Ciencia, Empreses, Formación y Empléu del Principáu d'Asturies, Manuel Melgarejo, presidente pa España y Portugal de Corteva Agriscience; Susana Rebaque, responsable del allugamientu d'Asturies de Corteva Agriscience y Beatriz Ávila Cobos, directora rexonal d'Enserta Empléu n'Asturies.

Tres l'actu inaugural, y a lo llargo de too el día de güei, ta desenvolviéndose un programa completu con talleres, charres, formaciones y conciertos abiertos al públicu y d'accesu gratuitu. Estos talleres busquen abrir una puerta de comunicación directa, accesible a tolos perfiles con o ensin discapacidá que quieran tener una oportunidá de recibir sofitu, feedback y aprendizaxe en distintes árees. Coles mesmes, a lo llargo de too el día, l'equipu de Selección de Talentu Europeo de Corteva n'Asturies ta ufiertando asesoramientu en preparación de currículums y entrevistes, o analises de fortaleces.

Alfonso López Muñiz, vicerrector d'Estudiantes de la Universidá d'Uviéu, foi l'encargáu de l'apertura mientres l'actu inaugural y reafitó “el compromisu de la institución académica coles persones con discapacidá, non solo col estudiantáu, sinón tamién col personal docente ya investigador o d'alministración y servicios”. El vicerrector destacó que ye xuna obligación y un deséu de les alministraciones públiques, y entá ye más de les universidaes, favorecer la integración de les persones con necesidaes específiques. Nesti contestu, mentó dalgunes de les midíes qu'aplica la universidá asturiana como l'atención y l'asesoramientu individualizáu, l'alministración de recursos de sofitu y midíes d'acción positiva, la equiparación n'igualdá d'oportunidaes y otres iniciatives de sensibilización. Anguaño, la Universidá Uviéu cunta con daqué más de 300 alumnos, nos distintos niveles, con exención de tases per discapacidá reconocida.

Pela so parte, Manuel Melgarejo, presidente de Corteva pa España y Portugal declaró que “buscamos arriquecer les vides de quien producen y peracaben, asegurando'l progresu pa les xeneraciones vinientes. Pa ello, tamos convencíos de que los equipos diversos son intrínsecamente más flexibles y con mayor capacidá d'aprender unos d'otros al traviés de perspectives, esperiencies y retos distintos. Esto déxanos caltener l'interés pa siguir anovando, actuar con valentía y faer lo correcto pa los nuesos veceros, compañeros de trabayu, socios y el nuesu planeta”, Coles mesmes, añedió que “Corteva ye xuna compañía bien nueva, pero, como entidá agrícola global especializada, tenemos la oportunidá de xenerar un cambéu positivu na nuesa industria por aciu la integración y la diversidá”.

Un compromisu del que tamién ye parte la so see local nel Complexu Industrial de Valle de Tamón, col so Centru d'Excelencia de Servicios pa la rexón de EMEA y la Planta de Producción de Protección de Cultivos, “Asturies ye un enclave estratéxicu pa la compañía a nivel global. Xunas instalaciones nes que cuntamos con un equipu de más de 400 profesionales que reflexa les nueses pilastres d'inclusión, diversidá y equidad”, destacó Susana Rebaque, responsable del allugamientu de Corteva n'Asturies. “Para Corteva Asturies ye fundamental siguir collaborando con axentes clave que promuevan l'insertamientu de persones con discapacidá, y estes xornaes, son un claru exemplu d'ello”, sorrayó Rebaque.  

De siguío, Beatriz Ávila, directora rexonal d'Enserta Empléu n'Asturies, recordó que nel Principáu la tasa de paru de les persones con discapacidá ye del 16,2%, 4,6 puntos porcentuales percima de les persones ensin discapacidá, la d'empléu d'un 28,2%, 11,5 puntos menos qu'ente les persones ensin discapacidá y la d'actividá d'un 29,8%, 43,8 puntos menos que la del restu. Nesti sentíu, destacó la importancia que tienen les aliances ente los distintos axentes clave pa revertir esta situación y, na so opinión, “tienen de caltenese mientres tol ciclu d'inclusión de la persona”. “N'Enserta Empléu trabayamos por una inclusión sociolaboral qu'incluya xuna educación calidable y un trabayu decente que dexe una crecedera económica sostenible con “S” de Social, y pa llevar a cabu esta xera, precisamos la collaboración imprescindible de l'Alministración, les empreses, y restu d'entidaes implicaes na inclusión de les persones con discapacidá”, concluyó.