Les investigaciones arqueolóxiques na redolada del palaciu de Cienfuegos y Peñalba, ente La Puela/La Puela Ayande y Cimalaviḷḷa/Cimadevilla, saquen a la lluz restos del poblamientu medieval de la zona. Fueron alcontraes delles estructures de función entá indeterminada que taríen n'usu, acordies con los primeros analises y estudios de materiales, alredor de los sieglos XII y XIII de la nuesa era. El investigadores conclúin que se trataría, por tanto, de les primeres evidencies materiales clares del poblamientu d'esta etapa histórica de La Puela.

Los trabayos arqueolóxicos desenvolviéronse, dientro del marcu del proyectu TempPa, nos meses d'agostu y setiembre de 2023 so la dirección d'Andrés Menéndez Blanco, arqueólogu allandés ya investigador del grupu Llabor de la Universidá d'Uviéu. Tanto nel trabayu de campu como nos estudios y analises posteriores participaron investigadores especialistes en distintos campos d'España y d'Italia. Los oxetivos d'esta campaña yeren dos. Per un sitiu, quería comprobase la esistencia d'estructures soterraes por aciu l'usu de georrádar y magnetómetru en dos parceles del pueblu de Cimalaviḷḷa/Cimadevilla. Estes máquines dexen detectar anomalíes sol terrén, incluyíes estructures como murios, cabianes o otros elementos d'interés arqueolóxicu ensin necesidá d'escavar. Pol otru, escaváronse cuatro pequenos sondeos en dos parceles xuntu al palaciu pa verificar la esistencia d'estructures anteriores al palaciu actual, construyíu nel sieglu XVI. Estes escavaciones son les que probaron que dalgunos de los elementos vistos por aciu georrádar y magnetómetru yeren medievales.

Pa fechar los restos unviaron amueses de madera carbonizao a dos llaboratorios de Francia y Estaos Xuníos especializaos n'analises de 14C (carbonu 14). Amás, tamién tán n'estudiu más de 200 fragmentos cerámicos recuperaos, que pueden datase atendiendo a la so técnica y decoración. Anque va ser necesariu avanzar más nos trabayos pa definir feches más precises, estos estudios y analises apurren datos abondos p'asitiar parte de los restos ente los sieglos XII y XIII.

P'Andrés Menéndez, “ye una reblagada, yá que son les primeres evidencies materiales clares d'un asentamientu medieval en La Puela”. Y ye que, hasta agora, de la Edá Media “solo conocíamos los enterramientos alcontraos por Cristina Arca na redolada de la ilesia parroquial” que, sicasí, “nun apurrieron munchos datos nin podemos fechar con precisión pola so mala traza de caltenimientu”. La documentación escrita tampoco ye bien elocuente, una y bones les menciones nos testos de la dómina son escases y bien curties. Esta investigación prueba que'l cuetu sobro'l que s'asitia'l palaciu yá taba ocupáu naquel periodu y, bien probablemente, yá con anterioridá a la fundación de la pola y creación del conceyu de Ayande/Ayande'l 24 d'ochobre de 1267 o 1268. 

Los trabayos cuntaron col sofitu económicu del programa de subvenciones pa investigaciones arqueolóxiques de la Conseyería d'Educación y Cultura del Principáu d'Asturies.

Referencia 
El proyectu TemPa (La Temporalidá nel Paisaxe. Arqueoloxía de les práctiques de xestión de los recursos y del poblamientu rural nel monte asturlleonés ente los sieglos XVI y XXI) ta acomuñáu al contratu postdoctoral de investigación Margarita Sales d'Andrés Menéndez Blanco y analiza dende l'Arqueoloxía los cambeos nes práctiques de xestión de los recursos naturales y la so relación coles formes de poblamientu nos postreros cinco sieglos nel cordal cantábricu.