L'equipu Wolfast Uniovi Racing Team, integráu por 30 estudiantes de la Universidá d'Uviéu, volvió bien satisfechu del so desempeñu na VII edición de la competición internacional Motostudent. L'equipu, con base nel Campus de Xixón, participó na fase final d'esti certame celebrada ente los díes 11 y 15 d'ochobre de 2023 nel circuitu Motorland Aragón (Alcañiz, Teruel). El Wolfast Uniovi Racing Team algamó'l puestu 15, na clasificación xeneral, ente los 42 participantes na competición, en superando una situación imprevista de mala solución. 

L'entamu de la fase final de dicha competición tuvo marcáu por un imprevistu bien malo de resolver pal equipu asturianu. Dos díes antes de viaxar a Teruel, mientres les comprobaciones finales del prototipu previes al viaxe, estropióse l'inversor del prototipu de motocicleta de competición eléctrica. Esti componente ye fundamental porque ye'l que convierte la corriente continua de la batería na corriente alterna trifásica qu'utiliza'l motor del prototipu y tamién dexa controlar dichu motor. L'equipu supo resolver esta situación buscando ya integrando un inversor alternativu nun tiempu récord y consiguiendo pasar toles verificaciones alministratives y técniques onde se valoraba la seguridá de la moto construyida pa correr nel circuitu.

Mientres la xornada del sábadu, 14 d'ochobre, desenvolviéronse les pruebes dinámiques, yá puntuables pa la competición. Estes pruebes consistieron nun test d'aceleración y frenada y xuna gymkhana d'axilidá. Ese mesmu día pela tarde tamién se realizaron entrenamientos llibres sobro'l trazáu del circuitu. El domingu, 15 d'ochobre pela mañana, realizóse la sesión de calificación. L'equipu nun consiguió clasificase directamente pa la carrera final y tuvo que correr un play-off, nel que s'alzó cola tercer posición, lo que-y valió el so pase a la final. Nesta prueba, l'equipu de la Universidá d'Uviéu nun consiguió terminar por cuenta de xuna frayatu de la exa del motor a dos vueltes del final.

Na categoría Electric, que ye onde competía l'equipu Wolfast Uniovi Racing Team, el UniBo Motorsport, de la Universidá de Bolonia foi'l vencedor tantu na fase MS1, onde se valora'l diseñu, la innovación y el plan de negociu, como na fase MS2 onde se valoren les resultancies dinámiques en pista y la carrera. Acompañáron-y nel podiu final de MS1 el EEBE ePowered Racing de la Universidá Politécnica de Cataluña y el 2Wheels Polito de la Universidá Politécnica de Turín. Nel podiu de MS2, acompañáron-y el Polimi Motorcycle Factory de la Universidá Politécnica de Milán y el UPM Motostudent Electric de la Universidá Politécnica de Madrid.

Les resultancies parciales más destacables del equipu Wolfast Uniovi Racing Team son un sestu puestu na categoría Best Design y un tercer puestu en MS1 Pitch, colo que llogró'l puestu undécimu de los 42 equipos na fase MS1 y el puestu decimoquintu na clasificación xeneral absoluta que suma les resultancies de les fases MS1 y MS2.

L'equipu Wolfast Uniovi Racing Team ta formáu por estudiantes de la Universidá d'Uviéu que vienen de cinco centros distintos (Escuela Politécnica d'Inxeniería de Xixón, Escuela d'Inxeniería Informática d'Uviéu, Facultá de Comerciu, Turismu y Ciencies Sociales Xovellanos, Facultá d'Economía y Empresa y Centru Internacional de Posgráu). El responsable del proyectu ye Álvaro Noriega, profesor del Departamentu de Construcción ya Inxeniería de Fabricación y collaboren el profesores Ángel Navarro, Ramy Georgious, Pablo García y Juan Manuel Guerrero, profesores del Departamentu d'Inxeniería Eléctrica, Electrónica, de Computadores y Sistemes.