Dos proyectos venceyaos a la innovación y la sostenibilidá nos ámbitos de la formación y la tecnoloxía dixital fueron escoyíos para la final de los premios Xplore Technology Awards 2023 de la multinacional alemana Phoenix Contact. Dambos proyectos fueron presentaos por investigadores del grupu Lemur y la Cátedra Milla de la Conocencia – Xixón Smart Cities, que lidera'l profesor Pablo Arboleya. La institución académica asturiana conviértese asina n'una de les poques universidaes que participen nesti concursu internacional con dos candidatures.

Los dos proyectos van ser presentaos el próximu 18 d'ochobre na see de Phoenix Contact en Bad Pyrmont, Alemaña, xuntu con otres 23 iniciatives provenientes d'universidaes de los cinco continentes.

L'equipu de la Cátedra Xixón Smart Cities va esponer, con una de les sos iniciatives, un sistema avanzáu de xestión d'activos enerxéticos venceyaos a la movilidá eléctrica nel apartáu de tecnoloxíes dixitales. Esti proyectu ye l'únicu escoyíu que se desenvuelve en cooperación tecnolóxica con otra universidá estranxera, nesti casu la Universidá de Concepción de Chile. La segunda propuesta que va presentar l'equipu Lemur ye'l proyectu denomináu Tech Education Metaverse, y va facer xuntu cola startup PXR, tamién venceyada a la Universidá d'Uviéu. Esta iniciativa foi escoyida na categoría d'educación para desenvolver un proyectu que'l so algame consiste en crear un metaverso formativu escalable por aciu realidá virtual para'l diseñu y desenvolvimientu d'infraestructures de recarga para vehículos eléctricos.

Ignacio Villaverde, rector de la Universidá d'Uviéu, destaca que la selección d'estos dos proyectos ye una amuesa más de la capacidá de la institución académica non solo de retener el talentu, sinón tamién d'atraelo. Villaverde fai fincapié, amás, na fortaleza y excelencia d'estos grupos que, cada vez más, reciben reconocencies non solo nacionales, sinón internacionales.

Phoenix Contact, al traviés del so filial Tech Education, lleva 20 años entamando esti concursu internacional de tecnoloxía y educación, tantu para estudiantes de secundaria y formación profesional, como para universitarios, profesores y entamadores nel ámbitu de la innovación tecnolóxica y la sostenibilidá. Nesta edición, coincidiendo cola celebración del so centenariu, los trés proyectos finalmente escoyíos van recibir el so premiu'l próximu 20 d'ochobre en Berlín n'una ceremonia que va ser presidida por Michael Kellner, secretariu d'Estáu del Ministeriu d'Asuntos Económicos y Acción Climática del gobiernu alemán.