Lucía Méndez ye llicenciada en Filoloxía Inglesa y desenvuelve la so vida profesional en Turquía, onde tien, dende 2017, una empresa dedicada a la vienta y esportación de productos turcos.  Ignacio Felgueroso ye llicenciáu en Dirección y Alministración d'Empreses y na actualidá ye profesor de mercadotecnia na Universidá de Anáhuac, México, onde tamién se dedica al mundu de la consultoría de negociu y a la realización d'eventos. María Teresa Menéndez ye llicenciada en Ciencies Económiques y Empresariales y trabaya na actualidá como Controller Financieru y responsable d'actividá en Crédit Mutuel Alliance Fédérale n'Estrasburgo. Los trés tienen una cosa de mancomún: son egresados pola Universidá d'Uviéu y los trés quixeron participar nun coloquiu nel Día de la Universidá de FIDMA, nun alcuentru xuntu al rector, Ignacio Villaverde, nel qu'analizaron la visión de la institución académica nel esterior. 

La conocencia de la Universidá d'Uviéu nel esterior, la necesidá de cuntar con una 'marca propia', la ufierta de posgrado de la institución o cómo se sienten ellos nos países nos que desenvuelven el so oficiu fueron dalgunos de les temes trataes nel coloquiu, celebráu na Sala Mirador de la Cortil Ferial Luis Adaro. Toos ellos coincidieron na calidá de la formación base qu'ufierta la Universidá d'Uviéu y analizaron aquelles cuestiones nes qu'hai posibilidaes de cambéu y meyora. María Teresa Menéndez esplicó que "unu de los retos a los que s'enfrenta la Universidá d'Uviéu ye la formación online, básica nos tiempos actuales". Pela so parte, Ignacio Felgueroso fixo fincapié na necesidá de "evolucionar los conteníos y les maneres de docencia". "L'alumnu te enseña a enseñar", dixo, "y ye necesariu faer escucha activa". Pela so parte, Lucía Méndez reivindicó'l papel de les humanidaes nel mundu actual. "Munchos de los empleos qu'agora mesmu tán en puxanza son empleos que podemos desempeñar aquellos qu'estudiemos humanidaes, tenemos que ser conscientes d'ello", dixo.   

Previu al coloquiu, el rector de la Universidá d'Uviéu, Ignacio Villaverde, recibió al conseyeru de Ciencia, Empresa, Formación y Empléu, Borja Sánchez, nel stand de la Universidá, nun alcuentru nel que charraron precisamente de la presencia de la institución nel esterior, con especial atención a l'alianza d'universidaes Ingenium y la pertenencia de la Universidá al Real Colexu Complutense en Harvard.