La Universidá d'Uviéu ye la segunda institución académica europea en cuntar con aseos específicos para persones ostomizadas, un serviciu col que, hasta agora en toa Europa, namá cuntaba la universidá sevillana Pablo de Olavide. El primeru de los cinco aseos de la Universidá d'Uviéu yá s'atopa instaláu nel campus d'El Cristu, na Facultá de Derechu, y los cuatro restantes van poner en marcha nes próximes selmanes, coles mires de que,  primero qu'acabe l'añu, tengan tamién con baños para persones ostomizadas los campus de Llamaquique, El Milán, Mieres y Xixón.

La instalación d'aseos para persones ostomizadas parte de la collaboración del Vicerrectorado de Relaciones Institucionales y Coordinación y de la Vicegerencia d'Infraestructures cola Federación d'Asociaciones de Persones Ostomizadas, FAPOE, integrada por 28 asociaciones de pacientes ostomizados de too el país. El principal oxetivu d'esta iniciativa ye que les persones ostomizadas tengan aseos accesibles a la so condición, ameyorando asina la so calidá de vida. Tal que esplica Humberto Rodríguez Solla, vicerrector de Relaciones Institucionales y Coordinación de la Universidá d'Uviéu “para consiguir esta meyora na calidá de vida de los ostomizados, la instalación d'aseos afechos ye una reblagada”. “La Universidá tien que ser accesible para toles persones, polo que la realización d'estes pequenes acciones ye fundamental para nós y para quien viven con una bolsa pegada al abdome para poder sacupar los sos escretes corporales”, dixo. “N'Asturies, la mayoría de los llugares que cunten con aseos afechos son hospitales, por eso ye importante dir ampliando la rede y que cada vez más edificios públicos, nesti casu les nueses facultaes y escueles, sían más inclusives nesti sentíu”, esplica Rodríguez Solla.

Tres la instalación del aséu nel campus d'El Cristu, dende la FAPOE señalen que “nun podemos más qu'aplaudir a la Universidá d'Uviéu, por escuchanos, entendenos y actuar en consecuencia por que la vida de les persones ostomizadas sía más fácil, nesti casu la de los estudiantes que viven con una bolsa pegada al abdome y los que van venir detrás”. “Hai que tener en cuenta que les ostomías tán a la orde del día y que a cualesquier -y puede asoceder que-y tengan que poner una bolsa, independientemente de la so edá”, señalen.  

Dende la Federación espliquen que “ensin aseos afechos les persones ostomizadas tienen qu'agachase o arrodillarse delantre d'un retrete convencional para poder balerar la bolsa ensin chiscase, una postura que non toos pueden adoptar amás de fae-yos perder la dignidá. Ello ye que son munchos los estudiantes universitarios qu'abandonaron los sos estudios por non tener baños nos que poder manipoliar el so ostomía”. 

N'Asturies nun esiste un rexistru oficial del númberu de persones que tán ostomizadas pero FAPOE  señala que “apocayá supimos que mientres l'añu 2021 nel HUCA practicáronse 1.800 ostomías. Esti datu fainos pensar que teniendo en cuenta al restu d'árees sanitaries de la rexón y, a los hospitales y clíniques privaos, el númberu de ostomizados en 2021 superó los 4.000”. 

Los baños para persones ostomizadas consten d'un inodoro a 75 cm del suelu, (al altor d'una mesa) encastrado n'una encimera na que poder posar los productos d'aséu y recambiu de la ostomía, un espeyu nel que poder vese'l estoma, asitiáu abargana del embelicu y, enxaguador de bolsa de pequenu calibre con pulsiador de gatíu según con un grifu convencional, portarrollos de papel y colgadores para'l bolsu.