Investigar, potenciar y fomentar l'usu de técniques d'Intelixencia Artificial nel ámbitu local, y analizar les ferramientes resultantes  coles mires d'ameyorar la calidá del serviciu que les alministraciones ufierten a la ciudadanía. Este ye l'oxetivu del conveniu que'l rector de la Universidá d'Uviéu, Ignacio Villaverde, y l'alcalde de Siero, Ángel García, roblaron esta mañana, y que se va materializar na creación del Centru d'Estudios sobro l'Impactu Social de la Intelixencia Artificial, CEISIA.

El conveniu, con una duración de cuatro años, cuenta con una aportación económica per parte del conceyu de Siero, de 100.000 euros añales. Amás, el consistoriu vence a la Universidá d'Uviéu l'usu del Antiguu Edificiu de la Casa de la Cultura de Llugones p'allugar ellí'l Centru d'Estudios sobro l'Impactu Social de la Intelixencia Artificial. Con ello, Siero va cuntar per primer vegada con presencia de la Universidá d'Uviéu nel conceyu. Yá n'abril d'anguaño, l'alcalde de Siero y el rector de la Universidá d'Uviéu roblaron un protocolu d'intenciones que punxo les blimes al conveniu robláu esta mañana. 

Ente les funciones que va tener el nuevu centru, que'l so equipu científicu va tar conformáu por investigadores de la Universidá d'Uviéu, va figurar l'analís, estudiu ya investigación de propuestes d'actuación basaes n'Intelixencia Artificial y la so aplicación nel ámbitu alministrativu, educativu, humanísticu y xurídicu-social; l'analís de les implicaciones que se deriven del usu de sistemes d'intelixencia artificial nel ámbitu alministrativu, educativu, humanísticu y xurídicu-social; l'aplicación y desenvolvimientu de técniques d'intelixencia artificial na enseñanza, nel tratamientu del llinguaxe alministrativu y la depuración o llimpieza de fontes de datos; el desenvolvimientu de técniques de predicción y meyora de procesos y la so posible aplicación al ámbitu de l'alministración local; l'espardimientu les temátiques rellacionaes col oxetu del conveniu según favorecer actividaes divulgatives sobro la tema; y la reflexón sobro les garantíes llegales y organizativas que tienen d'establecese nel usu d'estes nueves tecnoloxíes. 

Tres la firma del conveniu, Ángel García, alcalde de Siero, esplicó que se trata d'unu de los proyectos más ilusionantes del mandatu. Dende'l Conceyu creemos que'l futuru de los procedimientos alministrativos ta bien amestáu a los medios tecnolóxicos, concretamente, lo que puede apurrinos la Intelixencia Artificial”. Pela so parte, Ignacio Villaverde amosó'l so prestu en “la implicación d'Universidá d'Uviéu nestos campos de futuru”, y dixo que “somos xuna institución estratéxica qu'hai de liderar los grandes tresformamientos que nos imponen los tiempos”. Por ello, estimó al Conceyu de Siero'l so apueste pola institución académica y resaltó la importancia de qu'esta “tea nel territoriu”. “La universidá asturiana ten de ser un factor decisivu nel progresu d'Asturies, por ello, estimamos descomanadamente a los conceyos el so enfotu”, remató.